काठमाडौँ । नेकपा (माओवादी केन्द्र)सहित नौ वटा दलबीचको एकता घोषणा बुधबार बिहान ११ बजे हुने भएको छ ।
माओवादी केन्द्रका नेता अग्नि सापकोटाका अनुसार यसअघि सहमति पत्रमा हस्ताक्षर गरेका दलहरूले काठमाडौँको भृकुटीमण्डपमा संयुक्तरूपमा एकता घोषणा गर्ने तयारी गरेका छन् ।
सापकोटाले एकीकृत पार्टीको नाम ‘नेपाली कम्युनिस्ट पार्टी’ रहने जानकारी दिएका छन् । उनका अनुसार नयाँ पार्टीले जनताको चाहना अनुसार नीति–कार्यक्रम तयार गरी देशलाई समृद्धितर्फ लैजाने प्रतिबद्धता जनाएको छ ।
‘अहिलेसम्मका उतारचढाव, घुम्ती र मोड पार गर्दै अब देश समृद्धितर्फ अघि बढ्ने विश्वास गरेका छौँ,’ मंगलबार बसेको माओवादी केन्द्रको अन्तिम बैठकपछि सापकोटाले सञ्चारकर्मीहरूलाई बताए ।
उनले तत्कालका लागि माओवाद सिद्धान्त परित्याग गरिएको भए पनि माओका योगदानबारे सजीव छलफलमार्फत भविष्यमा पुनःस्थापित हुन सक्ने सम्भावना रहेको उल्लेख गरे ।
‘हाल एकता गर्नुपर्ने अपरिहार्यता भएकाले यस्तो निर्णय गरिएको हो,’ सापकोटाले भने ।
