काठमाण्डौ । विश्वमा महामारीको रूपमा फैलिएको नोबेल कोरोना भाइरस रोकथामको लागि महानगरीय प्रहरी कार्यालय रानीपोखरीले काठमाण्डौ उपत्यकाको बढि भिडभाड हुने र जोखिम बढि हुने १६ स्थानमा सर्वसाधरणहरूलाई हात धुनको लागि साबुन सहित पानी ट्याङकी राखेको छ ।
महानगरीय प्रहरी कार्यालयका प्रमुख प्रहरी नायब महानिरीक्षक विश्वराज पोखरेलले माछापुच्छ्रे बैङक संगको सहकार्यमा काठमाण्डौ, ललितपुर र भक्तपुरको बढी भिडभाड हुने स्थानहरूमा पानी ट्याङकी राखिएको जानकारी दिनु भयो । सरकारले कोरोना भाइरस रोकथामको लागि अत्यावश्यक बाहेक अन्य सेवाहरू बन्द गरी, बढी भिडभाड हुन नदिने लगायतका कार्यहरू सार्वजनिक गरेको अबस्थामा महानगरीय प्रहरी कार्यालयले आफ्नो तर्फबाट सतर्कता अपनाउदै नागरिकको सहजताको लागी बैङक संगको सहकार्यमा उक्त कदम चालिएको बताउनु भयो । साबुन पानीले हात धुने, स्यानीटाईजरको प्रयोग र माक्स लगाएर हिडेमा पनि केही हद सम्म नियन्त्रण गर्न सकिने विशेषज्ञको राय अनुसार उपत्यकामा सर्वसाधरण नागरिकहरूको सहजताको लागी उक्त कार्य गरिएको बताउदै सार्वजनीक स्थानहरूमा राखिएको साबुन पानीले हात धुन सबैमा आग्रह गर्नु भयो ।
कोरोना भाईरसको महामारी नियन्त्रण नभए सम्मको लागि बढी भिडभाड हुने स्थानहरू रत्नपार्क, बानेश्चर, गौशला, के.एम.सी. अस्पताल सिनामंगल, महाराजगंज चोक , शिक्षण अस्पताल लगायतका स्थानहरूमा आइतबार देखिनै राखिएको जानकारी दिनु भयो यसै गरी प्रसुती गृह थापाथली, टेकु अस्पताल, पाटन अस्पताल लगायत ललितपुर र भक्तपुरका बढी भिडभाड हुने र जोखिम बढि हुने स्थानहरूमा भोली सम्म राखि सकिने जानकारी समेत दिनु भयो ।
हरपल आम नागरिकको सेवा र सुरक्षामा हामी तैनाथ हुने छौ भन्दै पोखरेल भन्नु हुन्छ “ प्रहरी कर्मचारीहरूको लागि माक्स वितरण गरेका छौ, सर्वसाधरण नागरिकको लागि सार्वजनिक स्थानहरूमा सावुन सहित को पानी ट्याङकी स्थापना गरेका छौ” । हामी तपाईको लागि बाहिर निस्कन्छौ हाम्रो लागी तपाईहरू भित्र बसिदिनु होला भन्दै अत्यावश्यक काममा बाहेका घरभन्दा बाहिर निस्कने र बढिभिडभाडमा जाने नगर्न सबैमा आग्रह गर्नु भयो । हामी आफै सचेत भए मात्र रोगबाट बच्न सकिने भन्दै सरकारले नै सबै कार्य गरिदियोस भन्नु भन्दा आ-आफ्नो ठाउँबाट सकेको उपाय अपनाउनु पर्ने उहाँले बताउनु भयो ।
