नयाँदिल्ली । कोरोना महामारीको त्रास बढ्दै गएपछि नेपाल जान हिँडेका करिब दुई सय नेपाली अझै दिल्लीमा अलपत्र परेका छन् । महामारीको त्रासले भारतमा कामगर्दै आएको व्यापार व्यवसाय बन्द भएपछि उनिहरु नेपाल जान भनेर हिँडेका हुन् ।
भारतको केन्द्रीय तथा राज्य सरकारहरुले कोरोना महामारी फैलन नदिन लकडाउन गरेपछि भारतभरि नै व्यापारव्यवसाय ठप्प हुन पुगेको छ । जसका कारण भारतका दिल्ली लगायतका विभिन्न शहरमा काम गर्दै आएका नेपालीहरु घर जाने बेलामा यात्रुवाहक रेल र बससेवा बन्दसँगै पुरै भारतभर लकडाउन गरिएका कारण सबै जना दिल्ली र छेउछाउमा त्यसै अलपत्र परेका हुन्।
यिनीहरुमध्ये ८० भन्दा बढी नोयडा सेक्टरमा अलपत्र छन् । उनीहरुमध्ये पचासभन्दा बढी अधिकांश त्यही क्षेत्रमा क्यान्टिन, पसल र ठेलागाडा चलाउनेलगायतका पेशामा संलग्न थिए।
त्यसैगरी करीब पचासभन्दा बढी हरियाणाको गुवगावँको मेदान अस्पताल छेउछाउमा अलपत्र परेको बताइएको छ । बैंग्लोरबाट आएका २५ जना त दिल्लीकै छतरपुरमै विगत तीन दिनदेखिनै अलपत्र अवस्थामा छन् । यसका अतिरिक्त गोवाबाट आएका दश जना दिल्लीको पन्जाबी बागमा अलपत्र छन् ।
प्रवासी नेपाली संगठनहरुले पनि यसरी अलपत्र परेका नेपालीहरुलाई नेपाल सरकारले भारतसरकारसँग समन्वय गरेर उचित प्रबन्ध गर्नुपर्ने माग गरेका छन् । तर, दिल्लीस्थित नेपाली दूतावासले भने अलपत्र परेका सबै नेपालीहरुलाई घर लैजान सम्भव नभए पनि आवश्यक परेको खण्डमा खाना र आकस्मिक उपचारको व्यवस्थ गर्न तयार रहेको बताएको छ ।
