न्यूयोर्क
कोरोनाभाइरसका कारण विश्व बजारमा तेलको मूल्यमा गिरावट आउनेक्रम जारी छ । यसैबीच गोल्डम्यान स्याक्सले तेलको मागमा तिब्र गिरावट आएको भन्दै आगामी दिनमा तेलको मूल्य प्रतिब्यारेल २० डलरभन्दा कम हुने भविष्यवाणी गरेको छ ।
तेल उत्पादक कम्पनीहरुले तेलको उत्पादन पनि घटाएका छन् भने कतिपय तेलकुवा बन्द गरिएका छन् ।
गोल्डम्यानका अनुसार हवाई यात्रामा कमीका साथै धेरै मुलुकमा लकडाउनको अवस्था रहेकाले हवाई इन्धन र ग्यासको मागमा कमी आउन थालेको छ । गोल्डम्यानका विश्लेषकहरुको भनाईमा ब्रेन्ट कच्चा तेलको मूल्य प्रतिब्यारेल २० अमेरिकी डलरको आसपास आइपुग्नेछ ।
हाल विश्व बजारमा कच्चा तेलको मूल्य सालाखाला २९ डलर छ । अझ, अमेरिकी तेलको मूल्य २० डलरभन्दा न्यून हुनेछ । बिहीबार विहान अमेरिकी कच्चा तेलको मूल्य २३.७० डलर कायम भएको छ ।
मार्च महिनामा विश्वभर तेलको माग प्रतिदिन १ करोड ५ लाख ब्यारेलले घट्नेछ भने अप्रिलमा प्रतिदिन १ करोड ८७ लाख ब्यारेलले कमी आउनेछ । यस्तो अवस्थामा ओपेक र रसियाले तेल उत्पादनमा कटौती गर्ने सम्भावना पनि छ ।
