काठमाडौँ । संयुक्तराज्य अमेरिकामा सबैभन्दा बढी कोरोना भाइरसका संक्रमित भेटिएका छन् । विश्वका सबै मुलुकहरुभन्दा बढी कोरोना भाइरस संक्रमित हुने मुलुक अब बनेको समाचार छ ।
चीनको वुहानबाट शुरु भएको यो भाइरसको संक्रमण अमेरिकामा पनि प्रवेश गरेको हो । अमेरिकामा यो भाइरस भेटिएको धेरै समय भएको छैन । तर पनि छोटै समयमा यसको फैलावट भने अत्याधिक छिटो गतिले भएको छ ।
तथ्यांकअनुसार, मार्च २६ तारिक विहीबार अपरान्हसम्ममा कोरोना भाइरसबाट संक्रमित अमेरिकीहरुको संख्या ८३ हजार ६ सय ७२ पुगेको छ । जुन चीनको भन्दा २ हजार ३ सय ८७ जनाले बढी हो । चीनमा आजसम्म संक्रमितको संख्या ८१ हजार २ सय ८५ छ । नयां संक्रमणको दरका हिसाबले अमेरिकामा यो भाइरस यति छिटो फैलिएको छ कि २६ तारिक सांझसम्ममा १३ हजार ६ सय ८५ नयां केसहरु थपिएका छन् । न्यूयोर्क शहर अमेरिकामा सबैभन्दा बढी संक्रमित भएको शहर भएको छ ।
अमेरिकामा आजसम्म ११ सय ७६ जनाको यो संक्रमणबाट ज्यान गुमाइसकेका छन् । पछिल्ला केही दिनमा मात्र यो संक्रमण अमेरिकाका प्राय सबैजसो राज्यहरुमा यो भाइरसको संक्रमण फैलिइसकेको छ ।
भाइरस संक्रमणका कारण ज्यान गुमाउनेहरुमा इटाली अगाडि छ । यहां ८ हजार २ सय १५ जनाले ज्यान गुमाएका छन् भने स्पेनमा ४ हजार १ सय ५४ जनाको देहावसान भइसकेको छ । चीनमा भने हालसम्म ३ हजार २ सय ८७ ले ज्यान गुमाएका छन् ।
