काठमाडौं । नेपाली क्रिकेटका अनुभवी खेलाडी शरद भेस्वाकरले हङकङ सिक्सेसपछि अन्तर्राष्ट्रिय क्रिकेटबाट सन्न्यास लिने भएका छन् ।
नेपाल क्रिकेट संघ (क्यान)ले आइतबार शरदको कप्तानीमा हङकङमा हुने हङकङ सिक्सेस खेल्ने नेपाली टोलीको घोषणा गर्दै उक्त जानकारी दिएको हो ।
क्यानका अनुसार भेस्वाकरले यही प्रतियोगितापछि आफ्नो अन्तर्राष्ट्रिय करियरलाई बिदा दिने घोषणा गरेका छन् ।
शरद सन् २०२२ यता राष्ट्रिय टोलीमा परेका छैनन् । यद्यपि, उनले औपचारिक रूपमा सन्यास भने लिएका थिएनन् । उनी पछिल्लोपटक गतवर्ष आयोजित नेपाल प्रिमियर लिग (एनपिएल) मा चितवन राइनोजबाट खेलेका थिए। यस वर्ष भने उनी कुनै पनि टोलीमा बिक्री भएका थिएनन् ।
शरद सन् २०१४ मा पहिलोपटक विश्वकप खेल्ने नेपाली टोलीका सदस्य बनेका थिए । उनले नेपालका लागि टी–२० र एकदिवसीय दुवै फर्म्याटमा महत्वपूर्ण योगदान दिएका छन् ।
आगामी नोभेम्बर ७ देखि ९ सम्म हङकङमा आयोजना हुने ‘हङकङ सिक्सेस’मा नेपालले दोस्रोपटक सहभागिता जनाउनेछ । टोलीमा कप्तान शरद भेषावकरसहित आदिल आलम, सन्दीप जोरा, रसिद खान, लोकेश बम, बसिर अहमद र रुपेश सिंह रहेका छन् ।
