काठमाडौं । सरकारले ११ देशका लागि कार्यरत नेपाली राजदूतलाई फिर्ता बोलाउने निर्णय गरेको छ ।
सञ्चार तथा सूचना प्रविधि मन्त्री जगदिश खरेलका अनुसार तत्कालीन प्रधानमन्त्री केपी शर्मा ओली नेतृत्वको सरकारले नियुक्त गरेका ११ देशका राजदूतलाई फिर्ता बोलाउने निर्णय मन्त्रिपरिषद् बैठकले गरेको हो ।
फिर्ता बोलाइएका देशहरूमा चीन, जर्मनी, इजरायल, कतार, रुस, साउदी अरब, स्पेन, बेलायत, अमेरिका र जापान रहेका छन् ।
मन्त्री खरेलका अनुसार सम्बन्धित राजदूतहरूलाई कात्तिक २० गतेभित्र नेपाल फर्किन निर्देशन दिइएको छ ।
फिर्ता बोलाइएकाहरूमा चीनका लागि नेपाली राजदूत प्राध्यापक डाक्टर कृष्ण प्रसाद ओली, जर्मनीका लागि नेपाली राजदूत डाक्टर शैल रुपाखेती, इजरायलका लागि नेपाली राजदूत प्राध्यापक धनप्रसाद पण्डित छन् ।
यस्तै, यस्तै मलेसियाका लागि नेपाली राजदूत डाक्टर नेत्र प्रसाद तिमिल्सिना, कतारका लागि नेपाली राजदूत रमेश चन्द्र पौडेल, रुसका लागि नेपाली राजदूत जंगबहादुर चौहान साउदी अरबका लागि नेपाली राजदूत नरेश विक्रम ढकाल, स्पेनका लागि नेपाली राजदूत सनिल नेपाल, संयुक्त अधिराज्यका लागि नेपाली राजदूत चन्द्र कुमार घिमिरे, संयुक्त राज्य अमेरिकाका लागि नेपाली राजदूत लोकदशर्न रेग्मी र जापानका लागि नेपाली राजदूत दुर्गा बहादुर सुवेदी छन् ।
राजदूत फिर्ता गर्ने निर्णयपछि सरकारले ती देशहरूमा नयाँ राजदूत नियुक्त गर्ने तयारी थालेको जनाइएको छ ।
