काठमाडौँ । कोरोना भाइरसको संक्रमणबाट बेलायतमा फेरि अर्का एक नेपालीको ज्यान गएको दुःखद समाचार छ । बेलायतको स्वीन्डलमा बस्दै आएका भूपू क्विन्स गोर्खा याम बहादुर मल्लको निधन भएको हो ।
उनको शनिबार बिहान कोरोना संक्रमणका कारण निधन भएको पुष्टि भएको हो । स्वास्थ्यस्थिति कमजोर हुदै गएपछि उनलाई चार दिन अगाडि स्वीन्डनस्थित ग्रेट वेष्टर्न हस्पिटलमा भर्ना गरिएको थियो ।
उपचारकै क्रममा उनको सोही हस्पिटलमा शनिबार बिहान करिब तीन बजेतिर मृत्यु भएको समाजसेवी एवं क्षेत्री समाज बेलायतका अध्यक्ष राजन कुमार क्षेत्रीले जानकारी दिए ।
उनलाई ज्वरो आउने, रुघाखोकी, डाइरिया तथा बमिटिंग लगायतको समस्या उत्पन्न भएपछि हस्पिटल लागिएको र ४८ घण्टापछि कोरोनाको पुष्टि भएको क्षेत्रीले बताए ।
सन् २००४ देखि आफ्ना छोरा बुहारीका साथ बेलायतको स्वीन्डनमा बस्दै आएका मल्लको घर स्याङ्जा जिल्लाको वालिङ हो ।
