लकडाउनको समयमा बाहिर निस्कनेलाई पक्राउ गरेर दिनभरि राखेर छाड्दा पनि अटेर गरेपछि इलाका प्रहरी कार्यालय धरानले जनचेतना कक्षा दिन थालेको छ । प्रहरीले सडकमा भेटिएका स्थानीयलाई धरान– १२ स्थित पब्लिक स्कुलको खेलमैदानमा लगेर घाममा राखेर दुई घन्टासम्म कोरोनाबारे जनचेतना दिन थालेको हो । मर्निङवाक वा आवश्यक काम नपरी बाहिर निस्किनेहरूलाई नियन्त्रणमा लिई दुई घन्टासम्म कोरोनाबारे जानकारी गराएर छाड्न थालिएको इलाका प्रहरी कार्यालयका डिएसपी ढुण्डीराज न्यौपानेले जानकारी दिए ।
उनका अनुसार शुक्रबार साँझ सडकमा निस्केका एक सय ६० जना र शनिबार सडकमा निस्किएका ३४ महिलासहित एक सय ६३ जनालाई दुई घन्टा खेलमैदानमा राखेर कक्षा दिइएको छ । इलाका प्रहरी कार्यालय धरानका इन्स्पेक्टर तथा र्यापिड रेस्पोन्स टिमका संयोजक हेमराज ओलीले नियन्त्रणमा लिइएका सर्वसाधारणलाई कोरोना भाइरसबाट बच्ने उपाय र हुने जोखिमबारे जानकारी गराएर छाडिएको बताएका छन् ।
सो क्रममा २९ वटा मोटरसाइकलसमेत नियन्त्रणमा लिइएको छ । ती मोटरसाइकल लकडाउन सकिएपछि मात्र फिर्ता गर्ने ओलीले जानकारी दिए । दुई दिनयता धरानमा लकडाउनलाई कडा पारिएको छ । गाडी, मोटरसाइकलमा गस्ती पठाइएको छ । घरबाहिर रहने स्थानीयलाई भित्र रहन प्रहरीले भन्दै आएका छन् । धरान प्रवेश गर्ने चारैतिरका नाकामा कडाइ गरिएको छ । लकडाउनलाई प्रभावकारी बनाउन सशस्त्र प्रहरीसमेत परिचालन गरिएको छ ।
लकडाउन उल्लंघन गरेर शनिबार दिउँसो धरान– १३ र २० नंं। वडामा पर्ने जंगलमा दाउरा काट्न गएका २५ जना स्थानीयलाई सशस्त्र प्रहरीले नियन्त्रणमा लिएको छ । उनीहरूको साथबाट दाउरा काट्न प्रयोग गर्ने विभिन्न प्रकारका १७ थान घरेलु हतियारसमेत नियन्त्रणमा लिएको छ । दाउरा काट्दै गरेको समयमा सशस्त्र सुरक्षा बल धरान– १३ ले नियन्त्रणमा लिएको हो । दाउरा काट्न प्रयोग गर्ने पाँच थान बञ्चरो, पाँच थान खुकुरी, चार थान दाउ र तीन थान खुर्पा बरामद गरी धरान उपमहानगरपालिकालाई बुझाइएको सशस्त्र प्रहरीका डिएसपी राजेन्द्र श्रेष्ठले जानकारी दिए । नयाँ पत्रिका दैनिक
