काडमाडौं । भक्तपुर र काभ्रेपलाञ्चोकको सिमा क्षेत्र साँगामा पहिरो जाँदा अरनिको राजमार्ग अबरुद्ध भएको छ । ढुंगा र लेदोसहितको पहिरो गएको हो ।
हिजोदेखि निरन्तर परेको वर्षाका कारण भक्तपुरको सूर्यविनायक नगरपालिका–१० स्थित झोलुङ्गे पुलमा ढुंगा र लेदोसहितको पहिरो खसेको हो ।
शनिबार साँझ ५ बजेदेखि नै स–साना ढुंगा र लेदोसहितको पहिरो झरेको थियो । तर राति करिब ९ बजेदेखि सो सडक खण्डमा दुईतर्फी यातायात आवगमन अवरुद्ध भएको छ । वैकल्पिक मार्गका रुपमा भक्तपुर–नाला सडक खण्ड प्रयोग गरिएको प्रहरीले जनाएको छ ।
पहिरोमा पेट्रोलियम पदार्थ बोकेको ट्यांकर फसेको छ ।
अवरुद्ध सडकखण्डमा अहिले एक्स्काभेटर प्रयोग गरी पहिरो पन्छाउने प्रयास भइरहेको छ ।
अरनिको राजमार्ग हुँदै पूर्वका काभ्रे र अन्य जिल्ला जाने सवारीसाधन सञ्चालनमा शनिबारदेखि नै रोक लगाइएको छ ।
राष्ट्रिय विपद् जोखिम न्यूनीकरण तथा व्यवस्थापन प्रधिकरणले उपत्यका भित्रिने र बाहिरिने सवारीसाधनमा तीन दिन रोकलगाएसँगै भक्तपुरको जगातीबाट पूर्व जाने सवारी पनि चलेका छैनन् ।
