काठमाडौं । अर्थ मन्त्रालयले आजदेखि ‘एकीकृत कार्यालय व्यवस्थापन प्रणाली’को सुरुवात गरेको छ ।
अर्थमन्त्रीको स्वीकृतिसहित औपचारिक रुपमा शुभारम्भ भएको उक्त प्रणालीमार्फत मन्त्रालयभित्रका सम्पूर्ण कार्यहरू विद्युतीय माध्यममार्फत सम्पादन हुनेछन् ।
सञ्चार तथा सूचना प्रविधि मन्त्रालयअन्तर्गतको सूचना प्रविधि विभागले विकास गरेको यो प्रणालीमार्फत तोक आदेश तथा टिप्पणी निर्णय, चिठीपत्र दर्ता–चलानी, हाजिरी, बिदा तथा काज स्वीकृति, अभिलेख व्यवस्थापनलगायतका प्रक्रिया अब अनिवार्य रुपमा ई–साइन (विद्युतीय हस्ताक्षर) प्रयोग गरेर सम्पन्न गर्नुपर्ने व्यवस्था गरिएको छ ।
कार्यालय व्यवस्थापन प्रणाली लागू भएसँगै सरकारी निकायका काम एकै सूचना प्रविधि प्रणालीबाट सरल, सहज, छरितो र पारदर्शी हुने मन्त्रालयले जनाएको छ ।
साथै यसले कागजरहित (पेपरलेस) शासन प्रणालीलाई व्यवहारमा ल्याउने र निर्णय प्रक्रियामा छिटो फाइदा, खर्चमा मितव्ययिता, कार्यप्रक्रियामा पारदर्शिता तथा जवाफदेहितामा वृद्धि हुने अपेक्षा गरिएको छ ।
