काठमाडौँ । काठमाडौँ महानगरपालिकामा पछिल्ला वर्षमा डेङ्गी संक्रमणमा उतारचढाव देखिएको छ । महानगरले संक्रमण नियन्त्रणका लागि लार्भा खोजेर नष्ट गर्ने अभियानलाई निरन्तरता दिएको जनाएको छ ।
सन् २०२२ मा महानगर क्षेत्रमा २ हजार ९७३ जनामा डेङ्गी संक्रमण देखिएको थियो । यस्तै सन् २०२३ मा ६४३ मा सीमित भए पनि २०२४ मा फेरि बढ्दै २ हजार ८४ मा पुगेको तथ्यांक सार्वजनिक गरिएको छ । यस वर्ष अर्थात् २०२५ को पुसदेखि अहिलेसम्म २४८ जनामा संक्रमण देखिएको महानगरले जनाएको छ ।
यस्तै, शुक्रराज ट्रपिकल तथा सरुवा रोग अस्पताल, टेकुका अनुसार केवल काठमाडौँ जिल्लाभित्रै सन् २०२२ मा ९ हजार ८८६ जना, सन् २०२३ मा १ हजार ७१४ जना, सन् २०२४ मा २ हजार ९८४ जना र चालु वर्ष २०२५ को हालसम्म २२७ जनामा डेङ्गी संक्रमण पुष्टि भएको छ ।
अस्पतालका अनुसार संक्रमितमध्ये धेरैजसो काठमाडौँमा बसोबास गर्ने व्यक्तिहरू रहेका छन् । तर, ठेगानामा पालिकाको नाम स्पष्ट नहुँदा स्थानीय तह अनुसारको तथ्यांक छुट्ट्याउन नसकिएको बताइएको छ ।
संक्रमण फैलन नदिन महानगरले लार्भा नष्ट गर्ने कार्यलाई निरन्तरता दिइरहेको छ । महानगरले सर्वसाधारणलाई पानी जम्न नदिने, सरसफाइमा ध्यान दिने र डेङ्गी रोकथामका उपायहरू अपनाउन आग्रह गरेको छ ।
