काठमाडौं । अन्तरिम सरकारले गत भदौ २३ र २४ गते भएको जेन–जी पुस्ताको आन्दोलनका क्रममा तत्कालीन सरकारले गरेको दमनको छानबिन सुरु गरेको छ ।
सरकारले गठन गरेको उच्चस्तरीय न्यायिक आयोगले छानबिन थालेको हो । यसैगरी नेताहरुको सम्पत्तिमाथि पनि सरकारले अनुसन्धान अघि बढाएको छ ।
जेन–जीको आन्दोलन दमन गर्न भदौ २३ गते निर्देशन दिएको आरोपमा सरकारले तत्कालीन प्रधानमन्त्री केपी शर्मा ओली र गृहमन्त्री रमेश लेखकलाई छानबिनमा तान्ने तयारी गरेको हो ।
मन्त्रिपरिषद्का बैठकका निर्णय सार्वजनिक गर्न आयोजित नियमित पत्रकार सम्मेलनमा सञ्चार तथा सूचना प्रविधि मन्त्री जगदीश खरेलले राज्यका निकायले काम थालिसकेको बताए । ‘सरकारले केही नेताहरूको राहदानी रोक्का गर्ने गरी छानबिन प्रक्रिया अघि बढाएको समाचार आइरहेको छ, के यो सत्य हो ?’ भन्ने पत्रकारको जिज्ञासामा मन्त्री खरेलले भने– ‘तपाईंहरूले सुनेको कुरा सत्यनजिक छ । यसमा राज्यका निकायले आफ्नो काम गरिरहेका छन् । प्रधानमन्त्रीले पनि बिहीबार राष्ट्रका नाममा सम्बोधनका क्रममा दोषी कसैलाई उम्किन नदिने बताउनुभएको छ ।’
मन्त्री खरेलले विशेष अदालतका पूर्वअध्यक्ष गौरीबहादुर कार्कीको नेतृत्वमा उच्चस्तरीय जाँचबुझ आयोगसमेत गठन भइसकेको अवस्थामा अनुसन्धान र कारबाहीको दायरामा को–को तानिन्छन्, अहिले नै केही भन्न नसकिने बताए ।
तर, अन्तरिम सरकारले कार्की नेतृत्वको आयोगसँग यसबारेमा प्रारम्भिक छलफल गरिसकेको छ । अब आयोगका सदस्यहरूको शथपपछि औपचारिक रुपमा कारबाही प्रक्रिया अघि बढाइने भएको छ ।
काठमाडौं महानगरपालिकाका प्रमुख बालेन्द्र शाहले तत्कालीन प्रधानमन्त्री ओली र गृहमन्त्री लेखकमाथि कारबाही अघि बढाउन प्रधानमन्त्री सुशीला कार्कीलाई सुझाव दिइसकेका छन् । शाहको सुझावअनुसार नै सरकारले कम्तिमा ओली र लेखकलाई कारबाहीको दायराा ल्याउन लागेको हो ।
सरकारले ओली र लेखकसहितका नेताहरूको राहदानी नै रोक्का गरेर छानबिन अघि बढाउने तयारी गरेको छ ।
लेखकले १९ जना मारिएको दिन भदौ २३ गते नै राजीनामा दिएका थिए । उता ओलीले बालुवाटारबाट सेनाको उद्धार हेलिकप्टर चढ्नुअघि भदौ २४ गते राजीनामा दिएर हिँडेका थिए ।
यसैगरी बूढानीलकण्ठस्थित निवासमा ठूलो मात्रामा नगद रकम जलेको भेटिएपछि सरकारले नेपाली कांग्रेसका सभापति शेरबहादुर देउवालाई पनि अनुसन्धानमा तानेको छ ।
नेकपा माओवादी केन्द्रका अध्यक्ष पुष्पकमल दाहालको निवास खुमलटारमा पनि नगद रकम जलेको पाइएपछि सम्पत्ति शुद्धिकरण विभाग र नेपाल प्रहरीको केन्द्रीय अनुसन्धान ब्यूरोले मुचुल्का उठाएका छन् ।
यस्तै नेपाली कांग्रेसका नेता एवम् पूर्वऊर्जामन्त्री दीपक खड्काको घरमा पनि दुवै सरकारी कार्यालयका अधिकारीहरू पुगेर मुचुल्का उठाइसकेका छन् ।
