काठमाडौँ । जेनजी आन्दोलनको प्रदर्शनका क्रममा प्रहरी हत्या गरेको आरोपमा एक युवकलाई प्रहरीले पक्राउ गरेको छ ।
पक्राउ पर्नेमा काभ्रे घर भएका युवराज क्याप्छाकी रहेको जिल्ला प्रहरी परिसर काठमाडौँ स्रोतले जनाएको छ । उनले आन्दोलनको दिन महाराजगञ्ज वृत्तका प्रहरीलाई कुटपिट गरिरहेको भिडियो सार्वजनिक भएको थियो ।
उक्त भिडियोको आधारमा प्रहरीले क्याप्छाकीलाई पक्राउ गरेको हो । उनलाई कर्तव्य ज्यान मुद्दामा अनुसन्धान अघि बढाइने भएको प्रहरीले जनाएको छ ।
जेनजीको २४ भदौको आन्दोलनको क्रममा महाराजगञ्ज वृत्तका असई मिलन राय र जवान उत्तम थापाको हत्या गरिएको थियो ।
सिन्धुली घर भएका राय र दार्चुला घर भएका थापा आन्दोलनकारीको आक्रमणमा परेका थिए । जवान थापालाई ‘तँ डीएसपी’ भन्दै भीडले कुटपिट गरी हत्या गरेको प्रहरीले जनाएको छ ।
त्यस्तै, आन्दोलनकै क्रममा प्रहरी प्रभाग कोटेश्वरमा कार्यरत कास्की घर भएका सहायक हवल्दार अमृत गुरुङको पनि ज्यान गएको थियो ।
प्रहरीले यसलाई अत्यन्त गम्भीर अपराधको रूपमा लिएर अनुसन्धान तीव्र पारिएको जनाएको छ ।
