काठमाडौं । नेकपा माओवादी केन्द्रको द्वन्द्वकालमा छोरा कृष्णप्रसाद अधिकारीको हत्यामा न्यायको माग गर्दागर्दै आमरण अनसन बसेको ३३४ औं दिनमा सत्याग्रही नन्दप्रसाद अधिकारीको निधन भएको आज ११ वर्ष पुरा भएको छ ।
विडम्बना छोराका हत्याराहरुलाई राज्यले न्यायको दायरामा ल्याएको छैन । सर्वोच्च अदालतले पेसी सारेको सारै गरेको पनि वर्षौं भएको छ ।
न्यायको लडाईंमा पतिलाई साथ दिएकी सत्याग्रही गंगामायाले अपराघीहरूलाई कानुनी दायरामा ल्याउने सुशील कोइराला सरकारले प्रतिबद्धता जनाएपछि ३५९औ दिनमा ‘तरल पदार्थ’ मात्र ग्रहण गर्ने सर्तमा आमरण अनसन स्थगन गर्नु भएको हो ।
तीन नेताका भागबन्डामा तीन पटक तीनवटा सत्य तथा वेपत्तासम्बन्धी आयोगले कृष्णप्रसाद लगायत कसैलाई पनि न्याय दिलाउने चेष्टासमेत गरेन । पीडितले बहिष्कार गरेको बर्तमान दुबै आयोगलाई मार्ग प्रशस्त गर्न माग गरेका छन् । नयाँ सिराबाट विश्वसनीय आयोग गठन गर्न माग गरेका छन् ।
न्याय नपाएसम्म अन्तिम संस्कार नगर्ने अडान परिवारले राखेपछि नन्दप्रसादको शव ११ वर्षदेखि त्रिवि शिक्षण अस्पतालमा छ ।
नन्दप्रसादको २०७१ असोज ६ गते निधन भएको थियो । त्यसपछि न्याय माग्दै गङ्गामाया पटकपटक अनशन बस्दै आएकी छन् ।
गंगामायाले ‘न्यायको लडाई’ जारी राख्ने बताएकी छन् ।
