संयुक्तराज्य अमेरिकाको एक अदालतले अमेरिकी महिला फुटबल खेलाडीहरुलाई पुरुष सरह तलब दिनु नपर्ने फैसला गरेको छ । महिला खेलाडीहरुले आफूहरुलाई कम तलब दिएको गुनासो गर्दै अदालतमा दायर गरेको मुद्दा नै खारेज भएको छ । महिला फुटबल टिममा आबद्ध २८ जना खेलाडीले गत वर्ष अमेरिकी फुटबल महासंघ विरुद्ध मुद्दा दायर गरेका थिए ।
समान ज्याला ऐन बमोजिम आफूहरुले ६ करोड ६० लाख अमेरिकी डलर क्षतिपूर्ति पाउनु पर्ने दाबी गरिएको थियो ।
खेलाडीका तर्फकी प्रवक्ता मोल्ली लेभिन्सनले आफूहरुले अदालतको आदेशविरुद्ध अपिल गर्ने बताएकी छिन् । लेभिन्सनले भनिन्, “अदालतको फैसलाबाट हामीहरु अति बेखुशी छौं । हामी समान ज्यालाका लागि अझै लड्ने छौं ।” अदालतको आदेशमा भनिएको छ, “महिला टिमले समग्रमा र प्रति खेलका आधारमा हिसाब गर्दा पुरुषभन्दा बढी भुक्तानी भाइरहेका छन् ।”
अमेरिकी महिला टिमले गत वर्ष महिला विश्व कप जितेको थियो । यो सहित अमेरिकी टोली चार पटक विश्व च्याम्पियन बनिसकेको छ ।
महिला टिमले ५ पटक ओलम्पिक स्वर्ण पदक पनि जितेको छ । अदालतको आदेशपछि ट्वीट गर्दै अमेरिकी टोलीकी अग्रपंक्तिकी खेलाडी मेगान रापिनोले भनेकी छिन्ः “समानताको हकका लागि आफूहरुको आन्दोलन जारी रहनेछ ।” अमेरिकी फुटबल महासंघले सकारात्मक नतिजाका लागि खेलाडीसँग बसेर नयाँ मार्ग कोर्न आफूहरु तयार रहेको जनाएको छ ।
