वालिङ । जिल्लाको पुतलीबजार नगरपालिका–९ कोल्मामा आज दिउँसो करेन्ट लागेर एक युवकको मृत्यु भएको छ ।
बिजुलीको पोलमा चढेर इन्टरनेटको काम गर्ने क्रममा रौतहट गुज्रा नगरपालिका–१ रङ्गपुर घर भई हाल पोखरा फाइबर नेटमा काम गर्दै आउनुभएका २५ वर्षीय अरुणकुमार चौधरीको मृत्यु भएको जिल्ला प्रहरी कार्यालय स्याङ्जाका सूचना अधिकारी प्रशन्नराज चौधरीले जानकारी दिनुभयो ।
पुतलीबजार–१ ठाडोलाइनमा डेरा गरी बस्दै आउनुभएका चौधरीले नेटको कामका लागि बिजुलीको पोलमा चढ्न आल्मुनियमको भर्याङ अड्याउने क्रममा बिजुलीको तारमा भर्याङले छुँदा घाइते हुनुभएको थियो ।
निजको उपचारका क्रममा मृत्यु भएको जनाउँदै उहाँले घटनाबारे आवश्यक अनुसन्धान थालिएको बताउनुभयो ।
