काठमाडौंः नेकपा (माओवादी केन्द्र) का उपमहासचिव जनार्दन शर्माले पार्टी अध्यक्ष पुष्पकमल दाहालप्रति लक्षित गर्दै शेषनागले पृथ्वी बोक्ने कुरा दन्ते कथा भइसकेको टिप्पणी गर्नुभएको छ ।
शनिबार काठमाडौँमा आयोजित एक कार्यक्रमलाई सम्बोधन गर्दै उहाँले यस्तो टिप्पणी गर्नुभएको हो । उहाँको भनाई थियो शेषनागले पृथ्वी कहीँ बोक्ने गरेको भन्ने कहीँ छैन ।
उहाँले शेषनागले पृथ्वी बोक्ने कुरा दन्तेकथा भइसकेको मात्र बताउनुभएन, शेषनागले काँध फेर्दा या हल्लिँदा भूकम्प आउँछ भन्ने नसोच्न चेतावनी समेत दिनुभयो । उहाँले आजको विज्ञानले नागले काँध फेरेर होइन कि पृथ्वी किन हल्लिन्छ भन्ने कुराको वैज्ञानिक अनुसन्धान गरेर पुष्टि समेत गरिसकेको जिकिर गर्नुभयो ।
उहाँले भन्नुभयो, “शेषनागले कहीँ पृथ्वी बोकेको पनि छैन र शेषनागले बोकेको पनि हुँदैन । त्यो त दन्ते कथा हो । शेषनागले पृथ्वी बोकेको छ, त्यसले यसो हल्लाइदियो भने भूकम्प आउँछ भन्ने जस्ता कुरा त अब दन्ते कथा नै भैसके । आज त विज्ञानले अर्कै पुष्टि गरिसक्यो । त्यसकारणले यो पृथ्वी चल्छ, केही ढल्दैन । कसैले काँध फेर्दा केही हल्लिँदैन ढुक्क भए हुन्छ ।”
यो पृथ्वीलाई कसैले छोड्दैमा केही नहुने र नढल्ने उहाँको टिप्पणी थियो ।
सो पार्टीका अध्यय प्रचण्डले आफूले प्रमुख प्रतिपक्षी दल भए पनि सरकारको एक किसीमले काँध नै थापेको र यदि आफूले काँध फेर्ने अवस्था आयो भभने सबै सिस्टम नै हल्लिने टिप्पणी गर्नुभएको थियो ।
अध्यक्ष प्रचण्डको सो भनाईको जवाफमा आज शर्माले यो टिप्पणी गर्नुभएको हो । केही समयता अध्यक्ष प्रचण्ड र उपमहासचिव शर्माबीच असमझदारी बढ्दो देखिएको छ । उहाँहरुबीचको विवाद अब भने सार्वजनिक रुपमा नै यसरी सतहमा आउन थालेको हो । —न्युज एजेन्सी नेपाल
