काठमाडौं । झन्डै दुई वर्षदेखि हमासको नियन्त्रणमा रहेका विपिन जोशीको खोजी गर्दै उनकी आमा पद्मा र बहिनी पुष्पा आज इजरायल प्रस्थान गरेका छन् ।
पद्मा र पुष्पाको आज इजरायलका राजदूतले बिदाइ गरे । राजदूतले उनीहरुले उच्च ओहोदाका इजराइली कर्मचारी, आर्मी र नेताहरूसँग भेटघाट गर्नुहुनेछ बताएका छन् ।
कमाउ र पढ कार्यक्रम अन्तरगत कृषि तालिमका लागि इजरायल गएका कन्चनपुरका विपीन जोशीको अपहरण भएको २ वर्ष पुग्न लागेको छ । ७ अक्टोबर २०२३ मा हमासद्धारा अपहरणमा परेका जोशीको अवस्थाको बारेमा कुनै टुंगो लाग्न सकेको छैन ।
त्यहीक्रममा खोजीको लागि जोशीकी आमा पद्धमा र बहिनी पुष्पा इजरायल गएका हुन् । परिवारका सदस्यहरुका अनुसार जोशीको वास्तविक अवस्था पत्ता लगाएर मात्र फर्किने अठोटसहित उनीहरु इजरायल जान लागेका हुन् ।
तेल अबिबमा रहेको नेपाली राजदूतावासले उनीहरुलाई राष्ट्रपति आइज्याक हर्जोग र प्रधानमन्त्री बेन्जामिन नेतान्याहुसँग भेट गराउने प्रयास शुरु गरेको छ ।
२३ वर्षीय विपिन हमासले इजरायलमा सन् २०२३ अक्टोबर ७ मा आक्रमण गरी अपहरणमा पर्नुभन्दा करिब तीन हप्ताअघि मात्रै इजरायल पुगेका थिए । उनी दक्षिण इजरायलको एक कृषि फार्ममा कार्यरत रहँदा अपहरणमा परेका थिए ।
हमासले इजरायलमाथि गरेको भिषण आक्रमणका क्रममा जोशीलाई अन्य विदेशी नागरिक र इजरायलीहरूसँगै गाजापट्टीमा बन्धक बनाइएको थियो ।
सोही आक्रमणमा परी सपही–६, धनुषाका आनन्द साह, घोडाघोडी–४ कैलालीका नारायण न्यौपाने, पाँचनली–डोटीका राजन फुलारा, बाउनिया–३ कैलालीका आशिष चौधरी, लामिखाल–८ डोटीका पदम थापा, सारदा–३ सल्यानका प्रवेश भण्डारी, मालिकार्जुन–४ दार्चुलाका लोकेन्द्र सिंह धामी, जयपृथ्वी–६ बझाङका गणेशकुमार नेपाली, मधुवान–१, सुनसरीका राजेशकुमार स्वर्णकार र लेकाम–५ दार्चुलाका दिपेशराज विष्टको मृत्यु भएको थियो ।
