काठमाडौँ । सांसदहरुले जलश्रोत विधेयक, २०८१ मा जलवायु परिवर्तनको विषय जोडिनुपर्ने माग गरेका छन् ।
मंगलवार बसेको विधायन व्यवस्थापन समितिको बैठकमा बोल्दै राष्ट्रिय सभा सदस्य अञ्जान शाक्यले जलश्रोत विधेयकमा जलवायु परिवर्तनको विषय कतै न कतै उल्लेख गर्न माग गर्नुभएको हो । उहाँले यसले अन्तर्राष्ट्रिय स्तरमा पनि महत्व राख्ने उल्लेख गर्नुभयो । विधेयकमा जलवायु परिवर्तन तथा वातावरण विज्ञान राखेर जान उचित हुने सुझाव दिनुभयो । उहाँले भन्नुभयो, ‘जलश्रोत विधेयकमा जलवायु परिवर्तनको कहीँ न कतै उपस्थिति आवश्यक छ । कहीँ न कहीँ यसको उल्लेख हुनुपर्छ ।’
समितिको बैठकमा बोल्दै नेकपा (एकीकृत समाजवादी) का सांसद वेदुराम भुसालले विधेयकमा विकास भनेर मात्रै राखिएको तर उर्जा विकास हो वा के विकास भन्नेबारेमा स्पष्ट नरहेको बताउनु भयो । उहाँले यसको स्पष्ट परिभाषा दिन माग गर्नुभयो ।
उहाँले भन्नुभयो, ‘विकास भनेको के हो यसको परिभाषा चाहियो । परिभाषा पनि दिन नसक्ने कुराले अर्थ राख्दैन । विधेयकमा भित्र जेजे वस्तु राखिन्छ त्यसको सारसंक्षेप प्रश्तावना हो । भित्र छैन भने प्रश्तावनामा राखेर कुनै अर्थ हुँदैन ।’
समितिका अधिकांश सांसदहरुले विधेयकलाई प्रभावकारी बनाउने गरी निर्माण गर्नेपर्नेमा जोड दिएका छन् ।
