काठमाडौँ । राष्ट्रिय स्वतन्त्र पार्टीका सांसद असिम साहले भिजिट भिसामार्फत भएको मानव तस्करी र भ्रष्टाचारका काण्डहरुमा सरकारको मौन रहेको भन्दै आपत्ति जनाउनुभएको छ ।
प्रतिनिधि सभाको सोमवारको बैठकमा बोल्दै सांसद शाहले यस्तो आपत्ति जनाउनुभएको हो । उहाँले भिजिट भिसामार्फत मानव तस्करी भएको फाइल कहाँ पुग्यो ? भन्दै गृहमन्त्री रमेश लेखकलाई प्रश्न सोध्नुभयो । उहाँले भिजिट भिसा प्रकरणलाई जनताले बिर्सिने छन् भन्ने सोचेर गल्ति नगर्न समेत चेतावनी दिनुभयो । शाहले मन्त्री राजकुमार गुप्तालाई कारबाही नगरिएको भन्दै आपत्ति समेत जनाउनु भयो । राजीनामा भ्रष्टाचारको अपराधबाट मुक्ति पाउने गङ्गास्नान भएको भन्दै उहाँले कटाक्ष गर्नुभयो ।
उहाँले भन्नुभयो, ‘भिजिट भिसामार्फत मानव तस्करी भएको फाइल कहाँ पुग्यो ? म गृहमन्त्रीज्यूलाई सोध्न चाहन्छु । जनताले यो प्रकरण बिर्सिन्छन् भनेर गल्ति नगर्नुहोला । जनताले बिर्सने छैनन् । हामीले बिर्सन दिनेछैनौं । भ्रष्टाचारको अडियो बाहिरियो, धुस मागेको प्रमाणित भयो । अनि राजीनामा दिएपछि सबै पाप पखालियो । राजीनामा त भ्रष्टाचारको अपराधबाट मुक्ति पाउने गङ्गास्नान पो भएछ । मन्त्री राजकुमार गुप्ताले राजीनामा दिनुभयो । छानविनको फाइल बन्द भयो । त्यही अडियो नाम सुनिएका अर्का मन्त्री र पूर्व मन्त्रीलाई चाँही किन अदृश्य शक्तिले संरक्षण दिइरहेको छ ? के उहाँहरुका लागि यो देशमा अर्कै कानून छ सभामुख महोदय ?’
भ्रष्टाचारसम्बन्धी अडियो प्रकरणमा मुछिएका मन्त्री र पूर्वमन्त्रीहरूको संलग्नता भनिएपनि उनीहरूलाई अदृश्य शक्तिले जोगाएको आरोप लगाउनु भयो ।
