काठमाडौँ । सशस्त्र प्रहरी बल, नेपालका महानिरीक्षक राजु अर्यालले राज्यको लगानी र नीतिमा विपद् प्राथमिकताको विषय नपरेसम्म विपद्जन्य क्षति न्युनिकरण प्रभावकारी बन्न नसक्ने बताउनुभएको छ ।
शुक्रवार सशस्त्र प्रहरी बल, नेपालले आयोजना गरेको विपद् सम्बन्धी अन्तरक्रिया एवं छलफल कार्यक्रममा बोल्दै उहाँले सरकारले विपद्सम्बन्धी विषयलाई प्राथमिकतामा नराखेसम्म क्षति न्युनिकरण गर्न नसकिने बताउनुभएको हो ।
उहाँले संविधानको रक्षा, मौलिक हकको रक्षा र मानव अधिकारको रक्षा गर्न पनि विपद् न्युनिकरणको विषयलाई प्राथमिकतामा राख्नुपर्ने बताउनु भयो । महानिरीक्षक अर्यालले नेपालमा वार्षिक रुपमा सबैभन्दा बढी मृत्यु विपद्जन्य घटनाबाट हुने गरेको उल्लेख गर्दै यसलाई गम्भीरताका साथ लिन आग्रह गर्नुभयो । विपद् न्युनिकरणको विषय राज्यको प्राथमिकतामा पर्न नसकेको बताउनु भयो । विपद् न्युनिकरणका लागि सबै निकायहरुबीचमा समन्वय गरेर काम गर्न आवश्यक रहेको बताउनु भयो ।
महानिरीक्षक अर्यालले भन्नुभयो, ‘नेपालमा सबैभन्दा बढी वार्षिक रुपमा मृत्यु विपद्बाट भइरहेको छ । मानव सिर्जित र प्रकृति सिर्जित विपद्बाट भइरहेको छ । व्यक्तिको ज्यान गइरहेको बारेमा हाम्रो उच्च प्राथमिकतामा राज्यको नीति छैन । यदी संविधानको रक्षा गर्ने हो, मौलिक हक जोगाउने र मानव अधिकारको रक्षा गर्ने हो भने विपद्मा लगानी र नीति राम्रो बनाउन जोड दिनुपर्छ । सुरक्षा निकायले आफ्नो आफ्नो ठाउँबाट कार्यक्रमहरु गरिरहेको छ । हामीले सक्दो प्रयास हामीले गरेका छौँ । सबैले मिलेर गर्नुपर्छ । २५ जनालाई लाइफ ज्याकेट र केही सामग्रीहरु दिने हो भने प्रहरी नपुगेको बेलामा पनि स्थानीयहरुले नै उद्धार गर्नुहुन्छ । विपद्सँग सम्बन्धित कुराहरु समन्वय गरेर काम गर्नुपर्छ । बजेटको लागि पनि सजिलो हुन्छ ।’
महानिरीक्षक अर्यालले विपद् सम्बन्धी तालिम पार्टीगत वा अन्य जो कोही आएपनि गराउने प्रतिवद्धता जनाउनु भयो ।
