एजेन्सी । आइतबार म्यानचेस्टर टेस्टमा शुभमन गिल र रवीन्द्र जडेजाको लागि रेकर्डको दिन थियो ।
गिल इङ्गल्याण्ड विरुद्धको टेस्ट शृङ्खलामा सबैभन्दा धेरै रन बनाउने भारतीय ब्याट्सम्यान बने । उनी डेब्यू टेस्ट शृङ्खलामा ४ शतक बनाउने पहिलो कप्तान पनि बने ।
यस्ता छन् गिलले बनाएका कीर्तिमानहरु
गिल इङ्गल्याण्ड विरुद्धको टेस्ट शृंखलामा सबैभन्दा धेरै रन बनाउने भारतीय ब्याट्सम्यान
शुभमन गिल इङ्गल्याण्ड विरुद्धको टेस्ट शृङ्खलामा सर्वाधिक रन बनाउने खेलाडी बने। एन्डरसन–तेन्डुलकर ट्रफीको क्रममा गिलले अहिलेसम्म ४ खेलको ८ इनिङमा ७२२ रन बनाएका छन्, जसमा उनको उत्कृष्ट स्कोर २६९ हो । उनले यस शृङ्खलामा चार शतक बनाएका छन् र उनको औसत ९०.२५ छ ।
आफ्नो डेब्यू टेस्ट शृङ्खलामा ४ शतक बनाउने पहिलो कप्तान
शुभमन गिल कप्तानको रूपमा आफ्नो डेब्यू टेस्ट शृङ्खलामा ४ शतक बनाउने पहिलो कप्तान बने । उनीभन्दा पहिले केवल ५ खेलाडीहरू, वारविक आर्मस्ट्रङ, डन ब्राडम्यान, ग्रेग च्यापेल, विराट कोहली र स्टिभ स्मिथले कप्तानको रूपमा आफ्नो पहिलो टेस्ट शृङ्खलामा ३–३ शतक बनाएका थिए ।
गिलले टेस्ट शृङ्खलामा सबैभन्दा धेरै शतक बनाउनेमा ब्राडम्यान र गावस्करको बराबरी गरे
कप्तानको रूपमा टेस्ट शृङ्खलामा सबैभन्दा धेरै शतक बनाउने कीर्तिमान तीन खेलाडीको नाममा छ । सर डन ब्राडम्यानले १९४७–४८ मा भारत विरुद्धको घरेलु शृङ्खलामा चार शतक बनाएका थिए ।
यसपछि सुनील गावस्करले १९७८–७९ मा भारतमा वेस्ट इन्डिज विरुद्ध खेल्दा चार शतक बनाए । अब शुभमन गिल यो विशेष सूचीमा सामेल भएका छन् । उनले २०२५ मा इङ्गल्याण्ड विरुद्ध विदेशी पिचमा चार शतक बनाएर यो उपलब्धि हासिल गरेका छन् ।
४ शतक बनाउने गिल चौथो भारतीय
भारतको लागि टेस्ट शृङ्खलामा सबैभन्दा धेरै शतक बनाउने कीर्तिमान चार खेलाडीको नाममा छ, जसले एउटै शृङ्खलामा चार–चार शतक बनाएका छन् । सुनील गावस्करले यो उपलब्धि दुई पटक हासिल गरेका थिए, पहिलो पटक १९७१ मा वेस्ट इन्डिज विरुद्धको विदेश भ्रमणमा, अनि दोस्रो पटक १९७८–७९ मा भारतमा वेस्ट इन्डिज विरुद्ध खेल्दा ।
यसपछि विराट कोहलीले २०१४–१५ को अष्ट्रेलिया शृंखलामा चार शतक बनाए, जुन विदेशी शृंखला थियो । अब शुभमन गिल पनि यो विशेष सूचीमा सामेल भएका छन् । उनले २०२५ मा इङ्गल्याण्डमा इङ्गल्याण्ड विरुद्ध चार शतक बनाएर यो रेकर्ड दोहोर्याए ।
टेस्ट शृङ्खलामा भारतका लागि ७०० वा सोभन्दा बढी रन बनाउने ब्याट्सम्यान
गिल टेस्ट शृङ्खलामा ७०० वा सोभन्दा बढी रन बनाउने चौथो ब्याट्सम्यान बने । यो सूचीमा सुनील गावस्कर शीर्ष स्थानमा छन्, जसले १९७१ मा वेस्ट इन्डिज विरुद्धको विदेश भ्रमणमा ७७४ रन बनाएका थिए । यति मात्र होइन, उनले १९७८–७९ मा वेस्ट इन्डिज विरुद्धको घरेलु शृङ्खलामा ७३२ रन बनाएर यो उपलब्धि दोहोर्याए ।
२०२४ मा इङ्गल्याण्ड विरुद्धको घरेलु शृङ्खलामा यशस्वी जयस्वालले ७१२ रन बनाएका थिए । शुभमन गिलले २०२५ मा इङ्गल्याण्ड विरुद्धको शृङ्खलामा खेल्दा अहिलेसम्म ७२२ रन बनाएका छन् र उनको शृङ्खला अझै पनि जारी छ ।
