काठमाडौं । डडेल्धुराको क्वारेन्टाइनमा राखिएका साढे ६ वर्षीय बालकको शनिबार राति मृत्यु भएको छ। मृत्यु हुनेमा बालक जिल्लाको नवदुर्गा गाउँपालिका–३ का रहेका छन्। शनिबार राति १२ बजेपछि जिल्ला सदरमुकाम नजिकै रहेको डडेल्धुरा बहुमुखी क्याम्पसको क्वारेन्टाइनमा राखिएका बालक मृत्यु भएको डडेल्धुराका प्रहरीले जनाएको छ । प्रहरीका अनुसार आमाबाबुसँगै उनी भारतको मुम्बइबाट आइतबार मात्रै डडेल्धुरा पुगेका थिए। राती डडेल्धुरा पुगेको उनीहरुलाई बहुमुखी क्याम्पसको क्वारेन्टाइनमा राखिएको थियो।
बालक गम्भीर बिरामी परेको खबर पाएर प्रहरीले उनलाई आफ्नै गाडीमा अस्पताल पुर्याएका थियो । डडेल्धुरा अस्पतालले भने अस्पताल पुर्याउनुभन्दा अघि नै बालकको मृत्यु भएको पुष्टि गरेको छ । बालकलाई बिहान ३ बजे अस्पताल पुर्याइएको थियो। ‘
अस्पतालका अनुसार मृतक बालक मलेरिया रोगबाट ग्रसित रहेको बुझिएको छ । यसअघि उनी मुम्बईस्थित एक अस्पतालमा उपचाररत थिए। उनको शव अहिले डडेल्धुरा अस्पतालमा राखिएको छ। उनको आइतबार नै कोरोना परीक्षणका लागि थ्रोट स्वाब संकलन गरिने अस्पतालले जनाएको छ । सौर्य दैनिक
