सुर्खेत। पश्चिम सुर्खेतका बासिन्दाले तीन दशकअघि देखेको मदन भण्डारी राजमार्गको सपना पुनः जीवन्त बन्दै गएको छ।
बड्डीचौर–खम्बागाडे सडकखण्डमा निर्माण कार्य वर्षौंसम्म रोकिएको थियो। तर अब रुख कटान तथा जग्गा प्राप्तिको प्रक्रिया पूरा भएसँगै आयोजनामा सकारात्मक गति देखिन थालेको छ।
नेपाल सरकार मन्त्रिपरिषद्ले बराहताल गाउँपालिका र पञ्चपुरी नगरपालिकाभित्र पर्ने वन क्षेत्रका ८६४ वटा रुख हटाउन स्वीकृति दिएपछि निर्माणमा रोकिएको प्रमुख अवरोध हटेको हो। त्रिपक्षीय सम्झौता पश्चात निर्माणको नेतृत्व गरिरहेको मदन भण्डारी राजमार्ग आयोजना निर्देशनालयका अनुसार अब दश दिनभित्र रुख कटान सुरु गरिनेछ।
बड्डीचौर–खम्बागाडे खण्डको १३.९ किलोमिटर सडक निर्माण जयदेव जेभी कम्पनीले ४२ करोड रुपैयाँमा लिएको हो। दुई पटक म्याद थपिएको यो आयोजना हालसम्म ५० प्रतिशत मात्र प्रगति गर्न सकेको छ।
यद्यपि खम्बागाडेदेखि लगामसम्मका अन्य खण्डमा भने तीव्र रूपमा काम भइरहेको आयोजनाले जनाएको छ। ४७ किलोमिटर लम्बाइको उक्त खण्डमा दुई कम्पनीमार्फत २ अर्ब ५० करोड लागतमा निर्माण कार्य अघि बढिरहेको छ।
मदन भण्डारी राजमार्गले सुर्खेत मात्र होइन, सुदूरपश्चिमको कैलाली र डोटी जिल्लालाई पनि कर्णाली राजधानी वीरेन्द्रनगरसँग जोड्नेछ। अबको समयमा निर्माणको गति र समयमै सम्पन्नता नै स्थानीयको दशकौंको सपना पूरा हुने आधार बन्नेछ।
