काठमाडौं । भक्तपुरमा मृत भेटिएका दिदीबहिनी भारतबाट भागेर आएको खुलेको छ ।
बिहीबार बिहान पौने ७ बजेतिर मध्यपुर थिमि नगरपालिका-८ बोडे सिन्टीटारमा १७ वर्षीया मेनुका कँडेल र उनकी १५ वर्षीया बहिनी सिर्जना कँडेल मृत भेटिएका थिए । दुवै जना एकै डोरीमा झुण्डिएको अवस्थामा फेला परेको जिल्ला प्रहरी परिसर भक्तपुरका डिएसपी ढुण्डिराज न्यौपानेले जानकारी दिए ।
यी दिदीबहिनीले आत्महत्यापूर्व आफ्नै मोबाइलबाट आत्महत्या तयारीका विभिन्न चरणका फोटो खिचेर टिकटक बनाएको पाइएको छ । उनीहरुले एउटै डोरीको पासो लगाएको फोटोसहित भिडिओ हालेका थिए । उक्त भिडिओमा ‘मरेर गए नि नतोडिने बन्धन माया हो ’ बोलको गीत राखिएको छ ।
मृतक दुवै जना सुर्खेत पञ्चपुरी नगरपालिका-८ का रहेको खुलेको छ । उनका आमा-बाबु १०/१५ वर्षदेखि भारतमा काम गर्दै आएका थिए । उनीहरू करिब १५/२० दिनअघि मुम्बईबाट भागेका थिए । भारतबात भाग्नुअघि उनीहरूले फेसबुकबाट सबै आफन्तलाई ब्लक गरेको पाइएको छ ।
पछि दुवै जना नेपाल आएर भक्तपुरको बोडेमा डेरा गरी बस्न थालेका प्रहरीले जनाएको छ । घरबेटीलाई आफूहरू विद्यार्थीहरू हौं र बुबाले नेपालकै कुनै होटलमा काम गरिरहेको भन्ने जानकारी दिएर डेरामा बसेका थिए ।
दिदीबहिनी मृत फेला परेपछि उनीहरुका एक जना आफन्त प्रहरीको सम्पर्कमा आएकी छन् । बुबा पनि भारतबाट नेपाल आउन लागेका उनले बताईन् ।
प्रहरीले उनीहरूको शव पोष्टमर्टमको लागि अस्पतालमा पठाएको छ।
