काठमाडौं । राष्ट्रिय स्वतन्त्र पार्टीका सभापति रवि लामिछाने सहकारी ठगी प्रकरणमा साढे ३ महिनादेखि हिरासतमा छन् । उच्च अदालतको आदेश अनुसार जिल्ला कारागार रुपन्देहीमा उनी गत चैत २५ गतेदेखि बसिरहेका छन् ।
चैत २२ गते उच्च अदालत तुलसीपुर बुटवलको आदेशसँगै पक्राउ परेका लामिछानेलाई जिल्ला कारागार रुपन्देहीमा २५ गते ल्याइएको हो । त्यही दिनदेखि उनलाई जिल्ला कारागारमा राखिएको छ ।
कारागारमा उनलाई भेट्न पार्टीका नेता तथा कार्यकर्ता मात्र पुग्ने गरेका छन् । दैनिक २–३ जना भेट्न पुग्ने गरेका छन् । तर अरु राजनीतिक दलका नेता कार्यकर्ता तथा आमनागरिक खासै पुग्दैछन् ।
रविको स्वास्थ्य अवस्थालाई लिएर धेरै मानिसले चासो र चिन्ता व्यक्त गर्ने गरेका छन् । तर उनको स्वास्थ्य अवस्था राम्रो छ । उनले कारागारमा नियमित ब्यायाम र ध्यान गर्ने गर्छन् । पुस्तक पनि उनले निकै पढ्ने गरेका छन् ।
रविको स्वास्थ्यलाई लिएर सामाजिक सञ्जालमा चासो हुन थालेपछि उनका स्वकीय सचिव अविनाश आचार्यले सामाजिक सञ्जालमार्फत् स्पष्ट पारेका छन् । उनले लेखेका छन्–
रूपन्देही कारागारमा रवि दाईलाई भेट्न असमर्थ हुने धेरै शुभचिन्तकले उहाँको स्वास्थ्य अवस्थाबारे निरन्तर चासो र चिन्ता व्यक्त गरिराख्नुभएको छ। म निरन्तर रूपन्देहीमै छु । उहाँको स्वास्थ्य एकदमै राम्रो छ। उहाँ नियमित व्यायाम गर्नुहुन्छ, नियमित योग, ध्यान, प्राणायाम गर्नुहुन्छ, पुस्तकहरू पढ्नुहुन्छ । कारागारभित्रै उपलब्ध हुने सन्तुलित भोजन खानुहुन्छ। त्यसैले उहाँको स्वास्थ्यमा कुनै पनि समस्या छैन। स्वास्थ्यमा समस्या छ भनेर कहिँ कतै सामाजिक सञ्जालमा आएका कुराहरु झुठा हुन्। उहाँको स्वास्थ्य अवस्था बारे चासो राख्ने तपाईं सबैलाई उहाँले धन्यवाद भन्नुभएको छ ।
कारागारभित्र लामिछानेले अध्ययनमा धेरै समय बिताउने गरेका छन् । ऐतिहासिक पुस्तकहरूमा उनको रुचि रहेको बताइएको छ ।
लामिछानेले कारागारभित्रै पकाइएको खाना खाने गरेका छन् । त्यसमा सामान्यतया दाल, भात, तरकारी हुने गरेको छ ।
कारागार प्रशासनले भित्र रेडियो सुन्न र फोन गर्ने व्यवस्था बन्दीहरूलाई मिलाएको छ । कहिलेकाहीँ रवि लामिछानेले पनि फोनको प्रयोग गर्छन् ।
