काठमाडौँ । नेपाली कांग्रेसका नेता डा. शेखर कोइरालाले संघीय निजामती विधेयकको ‘कुलिङ पिरियड’ सम्बन्धी व्यवस्थामाथि नेकपा (एमाले)का सांसदहरूले हालेको संशोधनप्रति आपत्ति जनाएका छन् ।
सरकारको नेतृत्वमा रहेको एमालेका सांसदहरूले विधेयकको ‘कुलिङ पिरियड’ सम्बन्धी व्यवस्थामाथि राष्ट्रियसभामा हालेको संशोधनप्रति कोइरालाले आपत्ति जनाएका हुन् ।
गठबन्धन दलबीच भएको सहमति र समितिमा भएको सर्वसम्मतिविपरित आफ्ना सांसदहरूलाई संशोधन हाल्न लगाउनु एमालेको दोहोरो चरित्र भएको उनको आरोप छ ।
कोइरालाले सांसदहरूबाट संशोधन हाल्न लगाउनु एमालेको दोहोरो चरित्रमात्र नभई गठबन्धनलाई धोकासमेत भएको टिप्पणी गरेका छन् ।
कोइरालाले सामाजिक सञ्जालमा लेखेका छन् – ‘नेकपा एमालेका सांसदहरूले राष्ट्रियसभामा संघीय निजामती विधेयकमा हालेको संशोधन आपत्तिजनक छ। गठबन्धनका दलबीच भएको सहमति र समितिमा भएको सर्वसम्मतिविपरित यसरी आफ्ना सांसदहरूलाई संशोधन हाल्न लगाउनु एमालेको दोहोरो चरित्रमात्र नभई उसले देश, जनता, लोकतन्त्र र गठबन्धनलाई धोको दिएको हो । ’
यो विषयमा कांग्रेसले एमालेको आधिकारिक धारणा माग गर्नुपर्ने बताउँदै एमालेले हालेको संशोधन पास हुन नदिन सबैलाई आग्रह गरेका छन् । कोइरालाले भनेका छन्, ‘नेपाली कांग्रेसले यस सम्बन्धमा एमालेको आधिकारिक धारणा माग गर्नुपर्छ। साथै सबै मिलेर एमालेले हालेको संशोधन पास हुन दिनु हुन्न।’
उनले एमालेले संशोधन हाले पनि संघीय निजामती विधेयकबाट कुलिङ पिरियड नहट्ने दाबी गरेका छन् । कोइरालाले भनेका छन्, ‘कुलिङ पिरियड रहन्छ, रहन्छ र रहन्छ । कोही द्विविधामा नपरे हुन्छ।’
