काठमाडौँ । पत्रकार रवीन्द्र प्रजापति मृत भेटिएका छन् । रौतहट कटहरिया नगरपालिका ५ का ३० वर्षीय पत्रकार प्रजापति शनिवार बेलुका घरमै झुण्डिएका हुन् ।
झुण्डिएको पासो काटेर परिवारले उनलाई अस्पताल लगेको थियो । तर, अस्पतालले उनलाई मृत घोषणा गरेको हो ।
प्रहरीका अनुसार मृतक प्रजापतिको शव पोस्टमार्टका लागि गौर अस्पतालमा राखिएको छ ।
पत्रकार प्रजापति गरुडा म्यूजिकल एफएममा कार्यरत थिए । उनी रेडियोमा समाचार पढ्थे, समाचार लेख्थे । उनले कटहरिया नगरपालिकाका मेयर अजयप्रकाश जयसवालबाट धाकधम्की खेपिरहेको बताइन्छ ।
खानेपानी समस्या सम्बन्धी समाचार लेखेका कारण उनलाई केहीदिन अगाडि मेयर जयसवालले धाकधम्की दिँदै गालीगलौज गरेका थिए ।
मेयर जयसवालले दिएको धाकधम्कीका कारण पत्रकार प्रजापति तनावमा थिए । डरले घरबाट उनी बाहिर निस्किन सकेका थिएन् । त्यसैले पनि उनको आत्महत्यामा मेयरले दिएको धम्की मुख्य कारण रहेको स्थानीयको अनुमान छ ।
यता, प्रहरीले भने मेयरले धम्की दिएको थियो भन्ने कुरा थाहा नभएको र घटनाको अनुसन्धान भइरहेको जनाएको छ ।
