काठमाडौं । प्रधानमन्त्री केपी शर्मा ओलीले आज दिउँसो देशका विभिन्न स्थानमा भारी वर्षाको सम्भावना रहेकाले अत्यावश्यक बाहेक लामो यात्रा नगर्न आमनागरिकलाई आग्रह गर्नुभएको छ ।
प्रधानमन्त्री ओलीले आज सामाजिक सञ्जालमा पोस्ट गर्दै मौसम विभागले आज विभिन्न स्थानमा भारी वर्षा हुने अनुमान गरेको भन्दै सतर्कता अपनाउन आग्रह गर्नुभएको हो ।
उहाँले मौसमजन्य विपतबाट बच्न सुरक्षा निकायलाई आवश्यक सतर्कताका लागि जारी गरेको सूचनालाई पालना गर्न पनि भन्नुभएको छ ।
प्रधानमन्त्री ओलीले सुरक्षाकर्मीहरुलाई आवश्यक सुरक्षाको तयारी अवस्थामा रहन निर्देशन दिनुभएको छ ।
सामाजिक सञ्जालमा प्रधानमन्त्री ओलीले भन्नुभएको छ–
शुभ बिहानी !
मौसम विज्ञान विभागले आज दिउँसो देशका विभिन्न स्थानहरूमा भारी वर्षा हुने अनुमान गरेको छ। मौसमजन्य विपतबाट बच्न सुरक्षा निकायले आवश्यक सतर्कताका लागि जारी गरेको सूचनालाई पालना गरौं। अत्यावश्यक बाहेक लामो यात्रा नगर्न र सुरक्षित स्थानमा रहन अनुरोध गर्दछु। सुरक्षाकर्मीहरुलाई आवश्यक सुरक्षाको तयारी अवस्थामा रहन निर्देशन गर्दछु ।
