काठमाडौँ। नेपाल साहित्यिक पत्रकार सङ्घको १९औँ स्थापना दिवसका अवसरमा ‘विशिष्ट साहित्यिक पत्रकारिता सम्मान’बाट शशि पन्थी र ‘नेपाली मातृभाषा विशिष्ट साहित्यिक पत्रकारिता सम्मान’बाट रामप्रसाद साह सम्मानित हुनुभएको छ ।
मङ्गलबार यहाँ सम्पन्न स्थापना दिवस कार्यक्रममा नेपाल प्रज्ञा–प्रतिष्ठानका कुलपति भुपाल राईले ‘हाम्रो पुरुषार्थ’ साहित्यिक त्रैमासिकका सम्पादक पन्थी र ‘भोजपुरिया माटी’ साहित्यिक पत्रिकाका सम्पादक साहलाई सम्मान गर्नुभएको हो ।
कुलपति राईले साहित्यिक पत्रकारिताले सर्जकहरू उत्पादन गर्न निर्वाह गरेको भूमिका महत्त्वपूर्ण रहेको बताउनुभयो । उहाँले नेपाली भाषा साहित्यको उन्नयनमा साहित्यिक पत्रकारिताले ऐतिहासिक योगदान भुल्न नसकिने उल्लेख गर्नुभयो ।
कार्यक्रममा विशिष्ट अतिथि वरिष्ठ समालोचक ईश्वरचन्द्र ज्ञवालीले सङ्घले साहित्यिक पत्रकारिताको विकासमा पु¥याएको योगदानको चर्चा गर्नुभयो । वरिष्ठ पत्रकार तथा साहित्यकार पुरुषोत्तम दाहालले साहित्यिक पत्रकारिताको प्रवर्द्धनका लागि सरकारले भूमिका निर्वाह गर्नुपर्ने बताउँदै भाषा, साहित्य र संस्कृतिको संरक्षणबिना समाज अघि बढ्न नसक्ने बताउनुभयो ।
कार्यक्रममा भाषा आयोगका सदस्य मातृकाप्रसाद पोखरेलले साहित्यिक पत्रकारितालाई राज्यले जति उपेक्षा गरे पनि आफ्नै बलबुताले टिकेको बताउनुभयो । सङ्घका वरिष्ठ उपाध्यक्ष वियोगी बुढाथोकीले साहित्यिक पत्रकारिता व्यक्तिले आफ्नै करबलमा टिकाएकाबारे चित्रण गर्नुभयो ।
नेपाल साहित्यिक पत्रकार सङ्घका अध्यक्ष मोहन दुवालले सम्पूर्ण साहित्यिक पत्रकारको साझा सङ्गठनका रूपमा सङ्घले पु-याएको योगदान बिर्सन नहुने धारणा राख्नुभयो । रासस
