पाटन, (ललितपुर) । संस्कृति शिरोमणि हरिराम जोशीले भानुभक्तको कृतिले नेपाल राज्यलाई एकढिक्का बनाउन महत्त्वपूर्ण योगदान दिएको बताउनुभएको छ ।
साझा प्रकाशनले सोमबार केन्द्रीय कार्यालय ललितपुरको पुल्चोकमा आयोजना गरेको २१२औँ भानुभक्तजयन्ती विशेष कार्यक्रममा उहाँले नेपाली साहित्य आकाशमा भानुभक्त र लक्ष्मीप्रसाद देवकोटाले सबैभन्दा महत्वपूर्ण योगदान पुर्याउनुभएको बताउनुभयो ।
“आचार्य राष्ट्रियस्तरमा र देवकोटा अन्तरराष्ट्रियस्तरमा साहित्यकारका रूपमा परिचित हुनुहुन्छ । भानुभक्त र देवकोटालाई म समान दृष्टिले हेर्छु, भानुभक्तको कृतिले नेपाल राज्यलाई एकढिक्का बनाउन योगदान दिएको छ । देवकोटा विश्वसाहित्यमा महत्त्वपूर्ण योगदान दिनुभएको छ । दश दिनमा सुलोचना महाकाव्य लेखेर इतिहास कायम गर्नुभयो, देवकोटालाई महाकविको उपाधि जनताले दिएका हुन्”, उहाँले भन्नुभयो ।
संस्कृति शिरोमणि जोशीले भानुभक्तको कृति सधैँ अमर रहेको भन्दै भानुभक्तले साहित्यमार्फत सांस्कृतिक, राजनीतिक र नैतिक चरित्रका क्षेत्रमा ठूलो योगदान दिनुभएको उल्लेख गर्नुभयो ।
“जुनबेलासम्म नेपाल रहन्छ, त्योबेलासम्म भानुभक्तको पहिचान र चर्चा रहन्छ, भानुजयन्ती हैन, जन्मोत्सव हुनुपर्छ । पूर्वमेचीदेखि पश्चिम महाकालीसम्मका जनतालाई एकतामा बाँध्ने काम भानुभक्तको साहित्यले गरेको छ”, उहाँले भन्नुभयो ।
साझा प्रकाशनका पूर्वमहाप्रबन्धक प्राध्यापक डा रमेश भट्टराईले साझा प्रकाशनले हिजो कर्मचारीलाई तलब खुवाउन नसकेको अवस्थाबाट पुनर्जीवन प्राप्त गरिरहेको भन्दै नयाँ सञ्चालक समिति आएपछि सुधार हुँदै गतिशील यात्रामा पुगेको बताउनुभयो ।
उहाँले भानुभक्त र संस्कृति र राजनीति, भूगोल समाजको प्रतिविम्बमा आधारित रहेर सिर्जित भानुभक्तको रामायणमार्फत तत्कालीन समाज र मौलिकतालाई उजागर गर्ने प्रयत्न गरिएको बताउनुभयो । भानुभक्तले सृजनाका माध्यमबाट नैतिकतासँगै समाज र राजनीतिलाई जोड्ने काम गर्नुभएको उहाँले धारणा राख्नुभयो ।
कवि एवं गीतकार दिनेशचन्द्र थपलियाले ‘असारको महिना’ शीर्षकमा कविता वाचन गर्दै सृजना भाषा साहित्यको गहनाका रूपमा रहेका उल्लेख गर्नुभयो । कार्यक्रममा स्रस्टा विणा आचार्य, छन्दकवि प्रभा भट्टराई, धीरेन्द्र प्रेमर्शीलगायतले कणप्रिय, मर्मस्पर्शी साहित्यिक रचना वाचन गर्नुभएको थियो । रासस
