काठमाडौं । एएफसी महिला एसिया कप २०२६ अन्तर्गत समूह ‘एफ’ को छनोटमा नेपालले आज उज्वेकिस्तानसँग खेल्दैछ ।
उज्वेकिस्तानको तास्केन्तमा आज राति सवा ९ बजे नेपाल र उज्वेकिस्तान आमने–सामने हुँदैछन् । यो खेल नेपालका लागि निकै महत्वपूर्ण छ । खेल जिते नेपाल एएफसी महिला कपमा पुग्नेछ ।
जारी प्रतियोगितामा नेपालले उत्कृष्ट प्रदर्शन गरिरहेको छ ।
साबित्रा भण्डारी साम्बाको कप्तानीमा भएको नेपाली टोलीले अघिल्लो दुई खेलमा लाओसलाई ९ र श्रीलंकाविरूद्ध ८ गोल गर्यो।
समूहमा आयोजक उज्वेकिस्तानले पनि दुवै खेलमा जित निकालेको छ । उसले पहिलो खेलमा श्रीलंकालाई १०–० गोलले हराउँदा बुधबार लाओसलाई ७–० गोलले हरायो ।
यस्तोमा समूहमा नेपाल र उज्वेकिस्तान दुवैले ६–६ अंक जोडेका छन् । दुवैले १७–१७ गोल गरेका छन् भने कुनै गोल खाएका छैनन् ।
समूहबाट एक टोलीमात्र एसियन कपमा पुग्ने भएकाले आगामी शनिबार नेपाल र घरेलु टोली उज्वेकिस्तानबीच हुने खेल निर्णायक हुनेछ । सो खेल राति सवा नौ बजे हुनेछ।
दुवै टोलीको जित र गोलअन्तरको स्थिति समान छ । त्यसैले शनिबारको खेल बराबरीमा सकिएमा खेल पेनाल्टीमा पुग्ने एएफसीको नियम छ । किनभने हेड टु हेड, गोल अन्तर र धेरै गोल गरेको अवस्था सबैमा नेपाल र उज्वेकिस्तान बराबरीमा छन् ।
फिफा वरीयताको आधारमा हेर्ने हो भने उज्वेकिस्तान नेपालभन्दा बलियो टोली हो । उज्वेकिस्तानको महिला टोली फिफा वरीयतामा ५१ औं स्थानमा छ । नेपाल भने १००औं स्थानमा छ ।
हेड टु हेडमा पनि उज्वेकिस्तान अघि छ । उसले नेपालसँग खेलेका तीनै खेलमा जित निकालेको थियो। नेपालविरूद्ध उज्वेकिस्तानले ११ गोल गरेको छ । नेपालले भने ३ गोल मात्र गर्न सकेको छ ।
यसपटक घरेलु मैदानको फाइदा हुने उज्वेकिस्तान एसियन कप खेलिसकेको टोली हो । उसले ५ पटक एसियन कप खेलिसकेको छ। सन् २००३ पछि भने उसले एसियन कप खेल्न सकेको छैन। त्यसो त उज्वेकिस्तान २०२९ महिला एसियन कपको आयोजक समेत हो ।
