काठमाडौं । नेपाल कम्युनिस्ट पार्टीका संस्थापक महासचिव एवं नेपाली कम्युनिस्ट आन्दनेलनका प्रणेता पुष्पलाल श्रेष्ठको ९७ औं जन्मजयन्ती आज मनाइँदै छ ।
रामेछापको भँगेरीमा १९८१ मा जन्मिएका श्रेष्ठको २०३५ साल साउन ७ गते भारतको गोविन्दबल्लभ पन्त अस्पतालमा उपचारका क्रममा निधन भएको थियो । पुष्पलालले जनताका पक्षमा अधिकार स्थापित गर्ने लक्ष्यका साथ १० वैशाख २००६ मा नेकपा स्थापना गरेका थिए।
उनी सहित श्यामबजारमा पुष्पलाल, नरबहादुर कर्माचार्य, निरन्जनगोविन्द वैद्य, नारायणविलास जोशी, मोतीदेवी श्रेष्ठ भएर भारतको कलकत्तामा नेकपाको स्थापना गरेका थिए । राणा विरोधी आन्दोलनका शहीद गङ्गालाल श्रेष्ठका माइला भाइसमेत रहेका श्रेष्ठ दाजुको हत्या भएपछि १५ वर्षकै उमेरमा राणाशाही बिरोधी आन्दोलनमा सक्रिय भएका थिए ।
छोराहरु राजनीतिमा लागेकै कारण उनको पिता भक्तलालको सुब्बाको जागिर खोसिएको थियो। २०१७ सालको राजाको कदम पछाडि उनले भूमिगत निर्वासित जीवन विताएका थिए। २०२५ सालमा पञ्चायती निरंकुशताको अन्त्यका लागि संयुक्त जनआन्दोलनको कार्यदिशा अगाडि सार्ने उनी पहिलो नेता हुन्।
यस्तै सरकारले पुष्पलालको सम्मानमा राष्ट्रिय पुरस्कार स्थापना र पुष्पलाल मध्यपहाडी लोकमार्गसमेत निर्माण भइरहेको छ।
