काठमाडौं । ललितपुरको खोकनामा खेत रोप्न पुगेका किसान र प्रहरीबीच झडप भएको छ । आफ्नो जमिन खनजोत गरी रोपाइँ गर्न पुगेका किसानलाई लखेट्न पुगेको प्रहरी र स्थानीय किसानबीच दोहोरो झडप भएको हो । त्यस क्रममा प्रहरीले पनि केही सेल अश्रुग्यास हानेको बताइएको छ ।
खोकनाबासीले फास्ट ट्रयाक बनाउने क्रममा सरकारले विकासका नाममा रहेको जग्गाजमिन कब्जा गरेको भन्दै विरोध गर्दै आएका छन् । सरकारले पछिल्लो समय अधिग्रहण गरेको थियो र त्यो जमिनमा खनजोत पनि नगर्नु भनेको थियो । तर त्यसको विरोध गर्दै आएका किसान आज भने खोकनाको खड्का फाँटमा संयुक्त रोपाइँ कार्यक्रम राखेका छन् ।
सरकारले अधिग्रहण गरेको भनी सूचना नै प्रकाशन गरेको सो जमिनमा रोपाईँ नगर्न प्रहरीले आग्रह गरेको थियो । तर स्थानीय किसानहरुले सो जमिन आफ्नै भएकोले रोपाइँ गर्ने बताए र रोपाइँलाई निरन्तरता दिए । उनीहरुलाई प्रहरीले रोक्न खोजेपछि विहानैबाट तनाव भइरहेकोमा अघि प्रहरी पुगेर अश्रुग्याँस नै हानेको छ । स्थानीयबासीले प्रहरीलाई खेतमा पुग्नै अगाडि नै रोकेका थिए भने अरुले खानजोत गरेका थिए ।
स्थानीयले केही दिनयतादेखिको योजनाबमोजिम नै ट्याक्टर समेत लगाएर आजका लागि खनजोत र रोपाइँको योजना बनाएका थिए । थप टोली बोलाएर प्रहरी अगाडि बढ्न खोजेपछि झडप भएको छ । स्थानीयले ढुंगामुढा गर्दा केही प्रहरी घाइते समेत भएका छन् । भिडलाई तितरवितर बनाउन प्रहरीले अश्रुग्यास हानेको जनाएको छ । काठमाडौं(तराई द्रुतमार्ग, बाहिरी चक्रपथ र मातातीर्थ(भक्तपुर १३२ केभी प्रसारणलाइन खोकना हुँदै बनाउने तयारी सरकारले गरेको छ ।
तर स्थानीयबासीले भने विकासका नाममा सांस्कृतिक शहरमाथि अतिक्रमण गरेको भन्दै विरोध गर्दै आएका छन् । खोकना आफूहरुको पूख्यौँली थातथलोका साथै सांस्कृतिक क्षेत्र समेत रहेको उनीहरुको दाबी छ । उनीहरुको आन्दोलनमा नेवा सांस्कृतिक पुनर्जागरण अभियानसहित विभिन्न संघसंस्थाले पनि समर्थन गर्दै आएका छन् ।
सम्पदा तथा संस्कृति बचाउ अभियानका अभियान्ता गणपतिलाल श्रेष्ठ खोकनाजस्तो ऐतिहासिक, सांस्कृति र पुरतात्विक महत्व बोकेको नगरलालाई ध्वस्त गरेर यहाँका किसानको जमिन हडप्ने सरकारी नीतिको विरुद्ध आन्दोलित हुनुपरेको बताउँछन् ।
