काठमाडौँ । वैदेशिक रोजगारी व्यवसायी विमल ढकाल नेपाली काँग्रेसद्वारा गठित कोभिड १९ अनुगमन समितिको सदस्यमा नियुक्त भएका छन् । नेपाली काँग्रेसको गत जेठ २६ गते बसेको केन्द्रीय समितिको बैठकले काँग्रेसका सहमहामन्त्री डा.प्रकाशशरण महतको संयोजकत्वमा उक्त समिति गठन गरेको थियो ।
नेपालका वैदेशिक रोजगार व्यवसायीहरुको छाता संगठन नेपाल बैदेशिक रोजगार व्यवसायी संघका पूर्व अध्यक्ष ढकाल नेपाली काँग्रेसका महासमिति सदस्य समेत हुन् । विसं २०६२,६३ को जनआन्दोलनका समयमा नेपाली काँग्रेसका सभापति गिरिजाप्रसाद कोइरालाको संयोजकत्वमा गठित जनआन्दोलन परिचालन समितिको लुम्बिनी अञ्चलका सदस्य समेत रहेर काम गरेका ढकाल नेपाली काँग्रेस पाल्पाको जिल्ला कार्य समितिका पूर्व सदस्य समेत हुन् । उनी नेपाली काँग्रेस पाल्पा काठमाडौँ सम्पर्क समितिका संस्थापक अध्यक्ष पनि हुन् ।
कोभिड १९ का कारणले सबैभन्दा बढी तथा प्रत्यक्ष रुपमा प्रभावित रहेको क्षेत्र वैदेशिक रोजगार क्षेत्र पनि रहेकोले त्यस क्षेत्रको सम्बन्धमा अनुगमन गरी यसको प्रभाव न्यून गर्नका लागि उक्त समितिले उहाँलाई सदस्यका रुपमा मनोनित गरेको बताइएको छ । विश्वमा महामारीको रुपमा फैलिएको कोभिड १९ ले नेपालमा पारेको प्रभावका साथै यसका कारण उत्पन्न परिस्थितिका सम्बन्धमा अनुगमन गर्न नेपाली काँग्रेसले उक्त समिति गठन गरेको थियो ।
उक्त समितिले शुक्रबार पूर्णता पाएको छ । उक्त समितिमा काँग्रेस नेताहरु एनपी साउद, मोहनबहादुर बस्नेत, महालक्ष्मी उपाध्याय डिना, चन्द्र भण्डारी, गगन थापा, महेन्द्र यादव, मोहनबहादुर बस्नेतलगायत रहेका छन् ।
