काठमाडौँ । लुम्बिनी प्रदेश सभा सदस्य गीता गुरूङ पदमुक्त भएकी छन् ।
जनमत पार्टीबाट लुम्बिनी प्रदेश सभामा समानुपातिक सांसद बनेकी गुरूङलाई पछिल्ला ११ वटा बैठकमा लगातार अनुपस्थित भएपछि संविधान र नियमावलीअनुसार उनको पद रिक्त भएको घोषणा गरिएको हो ।
नेपालको संविधानको धारा १८० को खण्ड घ मा प्रदेश सभालाई सूचना नदिई लगातार दश वटा बैठकमा अनुपस्थित रहने प्रदेशसभा सदस्यको पद रिक्त हुने प्रावधान रहेको छ । सोही प्रावधान अनुसार गुरूङ पदमुक्त भएकी हुन् ।
यसअघिका पाँचौं अधिवेशनसम्मका ८३ वटा बैठकमध्ये ३४ वटा बैठकमा मात्र उपस्थित भएकी गुरूङ छैटौं अधिवेशनमा भने एउटा बैठकमा पनि उपस्थित भइनन् ।
उनी विगत साढे दुई महिनादेखि पार्टी र प्रदेश सभालाई जानकारी नदिई बेलायत बस्दै आएकी छन् । गुरूङ पदमुक्त भएपछि ८७ सदस्यीय रहेको लुम्बिनी प्रदेशसभामा अब ८६ जना सांसद रहेका छन् ।
