काठमाडौँ । नेपाली काँग्रेसका सांसद अर्जुननरसिंह केसीले पोखरा अन्तर्राष्ट्रिय विमानस्थल निर्माणमा धेरै आर्थिक अनियमितता भएको बताउनुभएको छ ।
बुधवारको सार्वजनिक लेखा समितिको बैठकमा बोल्दै उहाँले यस्तो बताउनुभएको हो । उहाँले विमानस्थल निर्माणमा सम्पूर्ण रुपमबाट भ्रष्टाचार भएको बताउनु भयो । उहाँले महंगो ब्याजमा ल्याएको ऋण नेपाली जनताको थाप्लोमा बोकाएर चुपचाप बस्ने परम्परा स्थापित गर्न नहुने बताउनु भयो । उहाँले निर्माणको जिम्मा देशसँग नभइ छिमेकी देशको ठेकेदार कम्पनीसँग सम्झौता भएकाले कोही रिसाउँछ भनेर प्रतिवेदनमा भ्रष्टाचारको कुरा लुकाउन नमिल्ने उल्लेख गर्नुभयो ।
उहाँले भन्नुभयो, ‘यो सम्पूर्ण रुपबाट भ्रष्टाचार भएको छ । यसमा धेरै आर्थिक अनियमितता भएको छ । अर्को कुरा यो एउटा कुनै कम्पनीले गर्यो । मित्र राष्ट्र चीनकोले गर्ला, अमेरिका, भारतकोले गर्ला । उनीहरुको कम्पनीसँग हामीले यत्रो महंगो ब्याजमा ल्याएको ऋण रकम नेपाली जनताको थाप्लोमा बोकाएर अनि हामी चुपचाप बस्ने परम्परा स्थापित भयो भने हाम्रो के हुन्छ । यो चीन र नेपालको डिप्लोमेटिक रिलेशनसँग सम्बन्धित कुरा होइन । एउटा ठेकदार कम्पनीसँग सम्बन्धित कुरा हो ।’
उहाँले ठेकेदार कम्पनीसँगको सम्झौतामा अनियमितता, आर्थिक घोटाला भएकोबारे स्थलगत अध्ययन गरेर दिएको निर्देशनअनुसार नै प्रतिवेदन आएको बताउनु भयो । प्रतिवेदनलाई पूरक मतसहित अख्तियारमा पठाउने काम गर्नुपर्ने बताउनु भयो ।
