काठमाडाैंः राजस्व अनुसन्धान विभागले राजस्व चुहावट गरेको अभियोगमा बुटवल क्षेत्रका २ वटा फर्मलाइ छ करोड ६९ लाख विगो कायम गरी उच्च अदालत तुल्सीपुर, बुटवलमा मुद्दा दायर गरिएकाे जनाएकाे छ ।
विभागका अनुसार राजस्व चुहावट गर्ने श्याम ग्लास इण्डष्ट्रिजले राजस्व चुहावट गरेको अभियोगमा छ करोड छ लाख विगो कायम गरी मुद्दा दायर गरिएको छ । उक्त इण्डष्ट्रिजले सरकारलाई तिर्नु बुझाउनु पर्ने राजस्व नतिर्ने एव कम तिर्ने उद्देश्य राखी उत्पादित सिसा तथा सिसाजन्य मालवस्तुमा अन्तःशुल्क असुल नगरी राजस्व चुहावट गरेकाे विभागले जनाएकाे छ ।
यस्तै, महाशक्ति गुट्खा उद्योगमाथि राजस्व चुहावट गरेको अभियोगमा ६३ लाख आठ हजार विगो कायम गरी मुद्दा दायर गरिएको छ । उक्त उद्याेगका संचालकहरुले सरकारलाई तिर्नु बुझाउनु पर्ने राजस्व नतिर्ने एव कम तिर्ने उद्देश्य राखी अन्तःशुल्कजन्य पदार्थ उत्पादित तथा विक्री वितरण गरी अन्तःशुल्क असुल नगरी राजस्व चुहावट गरेकाे देखिएकाे छ ।
यसैगरी, मालवस्तु तथा ढुवानी साधनको अनुगमन प्रणालीमा विल विजक प्रविष्टी नगरी कानुनको परिपालना नगरेको अभियोगमा विभिन्न फर्महरुलाई रु.३० लाख ७५ हजार जरिवाना गरिएको पनि विभागले जनाएकाे छ ।
काठमाण्डौमा कपडा लगायतको आयात तथा थोक विक्रि कारोवार गर्ने विभिन्न १४ वटा फर्मले व्यवसायिक प्रयोजनका मालवस्तु विक्री गर्दा मालवस्तु तथा ढुवानी साधनको अनुगमन प्रणालीमा विवरणप्रविष्टी नगरी मालवस्तु विक्री वितरण गरेको विभागकाे भनाइ छ ।
