काठमाडौं। जनमत पार्टीका निलम्बित कोषाध्यक्ष सुरेन्द्रनारायण यादव ५ लाख रुपैयाँ धरौटी बुझाएर रिहा भएका छन्।
ललितपुर जिल्ला अदालतका न्यायाधीश टेकराज जोशीको इजलासले धरौटीमा छाड्ने आदेश दिएपछि उनी रिहा भएको ललितपुर प्रहरी प्रमुख एसएसपी श्यामकृष्ण अधिकारीले जानकारी दिए।
७ वैशाखमा सप्तरीबाट पक्राउ परेका यादवमाथि जनमत पार्टीका प्रवक्ता डा. शरदसिंह यादवले ठगीको जाहेरी दिएका थिए। जाहेरीमा यादव दम्पतीविरुद्ध १ करोड ८५ लाख १ हजार रुपैयाँको बिगो माग गरिएको थियो।
विवाद ललितपुरको इमाडोलस्थित साढे चार आना जग्गामा बनेको तीन तले घरको हो। जुन पार्टीको नाममा खरिद गरिए पनि यादवले श्रीमतीको नाममा दर्ता गराएको आरोप लागेको छ। यादवले भने रकम चुनावका बेला खर्च गरेको दाबी गरेका छन्।
