काठमाडौं । अमेरिका र चीनबीच व्यापार सम्झौता भएको छ । एक–आपसमा कर बढाउने होडबाजीमा रहेका दुई देशबीच दुई दिनको वार्तापछि व्यापार सम्झौता भएको हो । यो सम्झौताले दुवै देशका अधिकारीहरु उत्साहित भएका छन् ।
अमेरिकाका सेक्रेटरी अफ ट्रेजरी स्कट बेसेन्टले यस सम्झौताबाट महत्वपूर्ण प्रगति भएको बताएका छन् र विस्तृत विवरणपछि सार्वजनिक गरिने बताएका छन् । सम्झौताबारे राष्ट्रपति डोनाल्ड ट्रम्पलाई जानकारी गराइसकेका उनको भनाइ छ ।
दुई देशबीच व्यापार युद्धको अवस्थामा रहेको बेला यस सम्झौता उपलब्धिमूलक मानिएको छ र यसले व्यापार सम्बन्ध सुधार गर्ने आशा गरिएको छ ।
अमेरिकी व्यापार प्रतिनिधि राजदूत जेमिसन ग्रिरले दुई दिनको वार्ता रचनात्मक भएको र निकै छिटो सहमतिको बिन्दुमा पुगेको बताए । ‘यसले हामीबीच त्यति ठूलो मतभेद थिएन जति ठूलो सोच थियो भन्ने देखाउँछ,’ उनले भनेका छन् ।
बेलाबेला अतिरिक्त शुल्क र कर लगाएर व्यापार युद्धको अवस्थामा पुगेका दुई देशका अधिकारीहरुबीच व्यापार सम्झौता हुनुलाई उपलब्धिमूलक मानिएको छ ।
हालै राष्ट्रपति ट्रम्पले अमेरिकाको व्यापार घाटा १२ सय अर्ब डलर पुगेको भन्दै ट्यारिफ लगाउने घोषणा गरेका थिए । जेमिसनले चीनसँग भएको यो सम्झौताले व्यापार घाटा समाधानतर्फ अगाडि बढ्न सघाउने विश्वास व्यक्त गरे ।
