काठमाडौं । अखिल नेपाल फुबटल संघ (एन्फा) को साधारणसभामा भाग लिन भनेर गएका पूर्वअध्यक्ष गणेश थापालाई गेटमै रोकेपछि धर्ना बसेका छन् ।
अदालतको आदेश विपरित साधारणसभा स्थलबाहिर रोकेको भन्दै उनले प्लेकार्ड बोकेर समर्थकहरुसहित धर्ना दिएका हुन् ।
यसअघि अदालतले थापालाई साधारणसभामा नरोक्न अन्तरिम आदेश दिएको थियो । सो आदेशको प्रतिलिपिसमेत बोकेर जाँदा पनि थापालाई गेटमै रोकेपछि उनी आक्रोशित भएका थिए । उनका छोरा गौरव थापालाई पनि प्रवेश दिईएको छैन ।
सोहिक्रममा थापाले साधारणसभामा भाग लिन पाउनुपर्ने माग गर्दै खेलकुद परिषदका सदस्यसचिव टंकलाल घिसिङलाई ज्ञापनपत्र बुझाएका छन् ।
अन्तर्राष्ट्रिय फुटबल महासंघ (फिफा)ले थापालाई भ्रष्टाचार गरेको, घुस लिएको र विभिन्न धाराहरु उल्लंघन गरेको ठहर गर्दै १६ अप्रिल २०१५ देखि दश वर्षे प्रतिबन्ध र २१ लाख जरिवाना तिराएको थियो ।
उनी माथिको प्रतिबन्ध १५ अप्रिल २०२५ मा फुकुवा भएको थियो । प्रतिबन्ध फुकुवा भए पनि एन्फाले साधारण सभामा आफूलाई रोक लगाउन सक्ने भन्दै उनले साधारण सभामा भाग लिन पाउनुपर्ने मागसहित उच्च अदालत पाटनमा रिट दिएका थिए ।
