काठमाडौँ । राष्ट्रिय युवा संघ पर्वतमा अधिवेशन गर्ने, नगर्ने विषयमा उत्पन्न विवादले झडप निम्तिँदा केन्द्रीय सदस्य अर्जुन पौडेलसहितका नेता घाइते भएका छन् ।
जिल्ला पार्टी कार्यालयमा भएको भेलाका क्रममा दुई पक्षबीच विवाद भएपछि झडप भएको हो । पौडेलको टाउकोमा गम्भीर चोट लागेको बताइएको छ ।
एक पक्षले पार्टी पदाधिकारीमाथि हातपात गर्न थालेपछि झडपको स्थिति भएको अर्को पक्षको दाबी छ । युवा संघका अध्यक्ष विनोद थापा र सचिव प्रकाश थकाली अधिवेशन नगर्ने पक्षमा थिए ।
तर, एमाले पर्वतको पहलमा बोलाइएको अधिवेशनमा झडप भएको हो । राष्ट्रिय युवा संघको जेठ ९ देखि ११ गतेसम्म पोखरामा महाधिवेशन हुँदैछ । त्योभन्दा अगाडि नै जिल्ला कमिटी तथा प्रतिनिधि छनोट गर्नुपर्ने भएका कारण केन्द्रकै निर्देशनमा आयोजक कमिटी गठन गर्ने भन्दै भेला डाकिएको थियो ।
एमाले जिल्ला अध्यक्ष गोविन्द गिरीका अनुसार एउटा समूहको विरोधकाबीच अहिले कार्यक्रम भइरहेको छ ।
