काठमाडौँ। सांसदहरूले सरकारले प्रस्तुत गरेको नीति तथा कार्यक्रममा विभिन्न क्षेत्रका बारेमा राम्रा पक्ष समेटिएका र अब तिनको कार्यान्वयनमा विशेष जोड दिनुपर्ने बताएका छन् ।
प्रतिनिधिसभाको आजको बैठकमा सांसद राजेन्द्रकुमार केसीले नीति तथा कार्यक्रममा समेटिएका बुँदाका आधारमा बजेट आउनुपर्ने र कार्यान्वयनमा जानुपर्ने धारणा राख्नुभयो । उहाँले भन्नुभयो, “पर्यटन, जलस्रोत, कृषि आदि क्षेत्र सबैमा सम्भावना छ । हामीले आफ्ना स्रोतलाई बेवास्ता गरेका छौँ । अब बजेट निर्माणमा युवाहरुलाई लक्षित कार्यक्रम ल्याउन जरूरी छ ।”
सांसद शोभा ज्ञवालीले तीनै तहका सरकारको योजनामा दोहोरोपन आउन नदिन र समन्वयसहितको बजेट ल्याउन आग्रह गर्नुभयो । “नीति तथा कार्यक्रमअनुसार बजेट आउने हो भने विकास निर्माणको काम गर्न सक्छौँ ।
यसले सबै क्षेत्र समेटेको छ । नीतिले उद्यमशीलतामा जोड दिने भनेको छ, अब रोजगारीको सिर्जना र अर्थतन्त्रमा सुधार ल्याउने गरी ठोस योजना आवश्यक छ”, उहाँले भन्नुभयो ।
