काठमाडौँ। संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले धार्मिक पर्यटन प्रवर्द्धनमा बद्रीनारायण धामको महत्त्वपूर्ण भूमिका रहने बताउनुभएको छ ।
नारायण पोखरेल प्रतिष्ठानले नागार्जुन नगरपालिका–७ रामकोटमा निर्माण गरेको बद्रीनारायण धामको आज प्राण प्रतिष्ठाको शुभारम्भ गर्दै उहाँले धार्मिक पर्यटन प्रवर्द्धनमा धामको महत्त्वपूर्ण भूमिका रहने बताउनुभयो ।
सगरमाथाको काख ऋषिहरूले तपस्या गरेको पावन भूमि नेपालमा पर्यटन प्रवर्द्धनका लागि यस्ता धामहरूको ठूलो सहयोग रहन्छ, संस्कृतिको रक्षा गर्न यस्ता कार्यक्रमले सहयोग पुग्नेछ”, उहाँले भन्नुभयो । मन्त्री पाण्डेले आत्यात्मिक क्षेत्रबाट मुलुकको विकासमा सक्रिय नारायण पोखरेलले मुलुकको शिक्षा र स्वास्थ्य क्षेत्रको विकासमा पुर्याएको योगदान अतुलनीय रहेको उल्लेख गर्नुभयो । मन्त्री पाण्डेले नारायण पोखरेलले देखाएको बाटो झाँगिदै गएको बताउनुभयो ।
भारतको उत्तराखण्डका बद्रीनाथ धामका अध्यक्ष दर्शन भारतीले नेपालको मौलिक धामका रूपमा रामकोटमा बनेको बद्रीनारायण रहेको बताउनुभयो । “भारतको बद्रीनाथ धाम जान नसक्ने दर्शनार्थीका लागि यही बद्रीनारायण धामको दर्शन गर्नुहोस्”, उहाँले भन्नुभयो ।
उहाँले भारतबाट नेपालको पशुपतिनाथ धाम दर्शन गर्न आएका पर्यटकलाई समेत रामकोटको बद्रीनारायण धामको दर्शन गर्न आग्रह गर्नुभयो । नारायण पोखरेल प्रतिष्ठानका प्रमुख संरक्षक एवं अध्यक्ष वाचन प्रवीण पण्डित दिनबन्धु पोखरेलले चार धाममध्ये एक धाम नेपालमा छ भन्ने सन्देश दिन बद्रीनारायण धामको निर्माण गरिएको जानकारी दिनुभयो ।
स्व नारायण पोखरेल आध्यात्मिक क्षेत्रबाट मुलुकको विकासमा सक्रिय हुनुहुन्थ्यो । उहाँले भौतिक विकास नभएसम्म समुन्नत मुलुक निर्माण हुन सक्दैन भन्ने मान्यता राख्दै आउनुभएको थियो ।
विसं २०११ जेठ ३२ गते गोरखाको बगुवामा जन्मनुभएका पोखरेलको विसं २०६२ वैशाख २३ गते रुपन्देहीको रामापुरमा हत्या गरिएको थियो । उहाँ नेपालको पहिलो धार्मिक सहिदसमेत हुनुहुन्छ । स्व पोखरेललाई जनस्तरबाट वाचन शिरोमणिको उपाधि दिइएको थियो ।
स्व पोखरेलले देशभरका ६५ भन्दा बढी जिल्लामा एक हजार १३६ पुराण वाचन गर्नुभएको थियो । पोखरेलको निधन भएसँगै विसं २०६४ असोज २३ मा स्थापना भएको नारायण पोखरेल प्रतिष्ठानले उहाँको व्यक्तित्व र कृतित्वलाई जीवन्त राख्ने काम गर्दै आएको छ ।
उक्त धाममा बद्रीनारायण मन्दिरबाहेक धामको प्रशासनिक भवन, नारायण पोखरेल प्रतिष्ठानको कार्यालय, योग ध्यान केन्द्र, हवन कुण्ड, गणेश, सूर्य, देवी र शिवसहितको पाञ्चायन मन्दिर निर्माण हुनेछ । रासस
