पूर्व नवयुवराज हृदयेन्द्र शाह यतिबेला चर्चामा छन् । खासगरी अभिनेत्री सुरक्षा पन्तले एक टेलिभिजन कार्यक्रममा हृदयेन्द्रका बारेमा दिएको अभिव्यक्तिलाई लिएर पक्ष र विपक्षमा सामाजिक सञ्जालमा बहस चुलिएको थियो ।
अभिनेत्री पन्तले नेपालमा अहिले राजतन्त्र नरहेको अवस्थामा हृदयेन्द्रले कलाकारिता पनि रोज्न सक्ने अभिव्यक्ति दिएकी थिइन् । यो अभिव्यक्ति लगत्तै उनीमाथि खासगरी राजसंस्थावादीहरुले हृदयेन्द्रका सम्बन्धमा मजाक गरेको भन्दै व्यापक आलोचना गर्नुका साथै पन्तले खेलेका चलचित्र बहिस्कार गर्नेसम्मको आह्वान गरेका थिए ।
त्यस लगत्तै पन्तको बचाउमा उत्रिएका प्रधानमन्त्री केपी शर्मा ओलीले पनि पूर्व नवयुवराज हृदयेन्द्रलाई नै लक्षित गरी राजा हुने सपना नदेख्न चेतावनी दिएका थिए ।
विदेशमा अध्ययनकै क्रममा रहेका हृदयेन्द्र यो विवादमा प्रत्यक्ष जोडिएका थिएनन् । तथापि उनले सामाजिक संजाल इन्स्टाग्राममा एक पोस्ट गरेर आफू यो मामिलाबाट टाढा रहेको बताएका छन् ।
उनले भनेका छन्, “हामी सबैलाई आफ्ना विचार खुला रुपमा व्यक्त गर्ने अधिकार छ, र सबैले एक– अर्काको विचारको सम्मान गर्नुपर्छ । दयालुता फैलाऔं । नेपालीहरुले एक–अर्कालाई सहयोग गर्नुपर्छ, नकि तल झार्न ।”
