काठमाडौँ । राष्ट्रिय प्रजातन्त्र पार्टी (राप्रपा) नेता रवीन्द्र मिश्रमाथि प्रहरीले निम्नस्तरको व्यवहार गरेको छ ।
थुनामा रहेका मिश्रलाई आज आइतबार म्याद थपका लागि जिल्ला अदालत काठमाडौँ लगिएको थियो । त्यसक्रममा प्रहरीले मिश्रमाथि अपमानजनक व्यवहार गरेको भिडियो अहिले सामाजिक सञ्जालमा भाइरल भइरहेको छ ।
राप्रपाका वरिष्ठ उपाध्यक्ष समेत रहेका मिश्रलाई प्रहरीले अदालत लैजाँदा धकेल्दै लगेको दृष्य देख्न सकिन्छ ।
थुनुवाको पोशाकमा रहेका मिश्र जब गाडीबाट ओर्लन्छन् अनि नमस्कार गर्न हात उठाउने वित्तिकै प्रहरीले हात तल झार्दिन्छ । अहिले यो दृष्यलाई हेरेर चौतर्फी आलोचना भइरहेको छ ।
मिश्रको हातमा हत्कडी यथावत रहेको छ । उनले प्रहरीसँग हत्कडी भएको हातले इशारा गर्दै भने,‘नमस्कार गर्नुपरेन ?’
मिश्रलाई गत चैत १५ गते तिनकुने हिंसात्मक घटनामा संलग्न रहेको आरोपमा प्रहरीले पक्राउ गरेको थियो ।
