काठमाडौँ । पत्रकार सविना कार्की समाचार सङ्कलनका क्रममा घाइते भएकोबारेमा नेपाल पत्रकार महासङ्घको ध्यानाकर्षण भएको छ ।
एक विज्ञप्ति जारी गर्दै महासचिव रामप्रसाद दाहालले उक्त घटनाले प्रेस स्वतन्त्रता र नागरिकको सुसूचित हुने संवैधानिक अधिकारमा आघात पुगेको बताए ।
आज काठमाडौँको नयाँ बानेश्वरमा आन्दोलनरत शिक्षक र प्रहरीबिच भएको झडपको समयमा समाचार सङ्कलन गरिरहेको बेला प्रहरीले हानेको पानीको फोहोराले आखाँमा लाग्दा कार्की घाइते भएको थिइन ।
नागरिकलाई सुसूचित गराउने धर्म निर्वाहमा जुटेकी पत्रकार कार्कीमाथि प्रहरीले गरेको प्रहार अत्यन्त निन्दनीय र खेदजनक रहेको महासङ्घले जनाएको छ । साथै उनको शीघ्र स्वास्थ्य लाभको कामना गर्दै घटनाको छानबिन गरी दोषीमाथि कानुनी कारबाही गर्न तथा घाइते पत्रकारको उपचारको सबै व्यवस्था मिलाउन समेत माग गरेको छ ।
घाइते पत्रकार कार्कीको अहिले तिलगंगा आँखा अस्पतालमा उपचार भइरहेको छ ।
