काठमाडौं । वायु प्रदूषणका कारण केही दिनअघिसम्म धुम्म बनेका पर्यटकीय क्षेत्र अहिले खुलेका छन् । हिमालदेखि तराईसम्मकै पर्यटकीय स्थल अहिले मनमोहक देखिन्छन् ।
सरकारले वार्षिक १८ लाख पर्यटक भित्र्याउने लक्ष्य राखेको छ । यसका लागि पर्यटकीय क्षेत्रको प्रचारप्रसार गर्नुपर्ने हुन्छ । अहिले पर्यटकीय गन्तव्यहरुका राम्रोसँग प्रचार हुन सकेको छैन ।
त्यसो त पछिल्ला दिनमा आन्तरिक पर्यटकहरुको चहलपहल बढेको छ । यसले पर्यटकीय गतिविधिमा भने केही सहज बनाएको छ ।
नेपालका कयौं पर्यटकीय स्थलहरु छन् । नेपालका जस्ता पर्यटकीय स्थल विश्वका अन्य ठाउँमा सायदै पाइन्छन् । राससले खिचेका केही पर्यटकीय स्थलका तस्बिर तपाईंका लागि ।
सोलुखुम्बुको खुम्बु पासाङल्हामु गाउँपालिका ५ स्थित थामेगाउँ । गत वर्ष साउनमा हिमताल फुटेर आएको बाढीले क्षतिग्रस्त थामेका संरचनाहरु पुनर्निर्माणका कार्य जारी छ ।
मुस्ताङको जोमसोम विमानस्थलबाट पोखरातर्फ उड्दै गरेको जहाज र पृष्ठभूमिमा निलगिरि हिमाल।
हिमाली जिल्ला मनाङको मनाङ ङिस्याङ गाउँपालिका–५ भ्राकास्थित अन्नपूर्ण हिमशृङखलाको पृष्ठभूमिमा चामे–खाङसार सडकखण्ड । सडक निर्माणसँगै स्थानीय तथा पर्यटकलाई आवतजावतमा सहज भएको छ ।
सोलुखुम्बुको खुम्बु पासाङल्हामु गाउँपालिकामा अवस्थित तेन्जिङ –हिलारी विमानस्थल ‘लुक्ला’ । सगरमाथा आरोहण तथा खुम्बुक्षेत्र भ्रमणका लागि ‘लुक्ला’ व्यस्त विमानस्थलको रुपमा रहेको पाइन्छ ।
मुस्ताङको थासाङ गाउँपालिका–५ स्थित टिटि ताल र आसपासका दृश्य । पर्याप्त प्रचारप्रसारको कमीले गर्दा टिटि तालमा सोचेजस्तो पर्यटक पुग्न सकेको छैन । स्थानीय निकाय, जिल्लास्थित सरोकारवाला निकाय र गाउँलेहरुले प्रचारप्रसारका लागि आवश्यक पहल गरेमा आन्तरिक तथा बाह्य पर्यटक यहाँसम्म पुग्न सक्नेछन्।
सुनसरीको इनरुवा नगरपालिका-९ स्थित किसानको खेतमा आहाराको खोजीमा रहेका बकुल्लाका बथान ।
