काठमाडौं । राष्ट्रिय प्रजातन्त्र पार्टीका प्रवक्ता मोहनकुमार श्रेष्ठले वरिष्ठ उपाध्यक्ष रविन्द्र मिश्रको रिहाइको पहल गरिदिन अपील गरेका छन् ।
प्रवक्ता श्रेष्ठले आज काठमाडौं प्रहरी परिसरमा पुगेर वरिष्ठ उपाध्यक्ष मिश्रलाई आफूहरुले भेटेको र मिश्रले राज्यविरुद्ध कुनै कसुर नगरेको दाबी गरेका छन् । प्रहरीले भने मिश्रविरुद्ध राज्यविरुद्धको अपराध गरेको आरोपमा अनुसन्धान गरिरहेको छ ।
गत चैत १५ गते काठमाडौंको तीनकुनेमा राजावादी समूहले गराएको हिंसात्मक प्रदर्शनमा मिश्रको संलग्नता रहेको आरोपमा प्रहरीले पक्राउ गरी अनुसन्धान गरिरहेको छ ।
प्रवक्ता श्रेष्ठले मिश्रसँग आज भेटेपछि सामाजिक सञ्जालमा पोस्ट गर्दै उहाँको शीघ्र रिहाइका लागि आवाज उठाइदिन विभिन्न राजनीतिक दल, मानवअधिकारवादी संघसंस्था, नागरिक समाज, आमसञ्चारमाध्यमलगायतलाई अपील गरेका छन् ।
उनले सामाजिक सञ्जालमा लेखेका छन्–
चैत १५ गतेको तीनकुने घटनामा पक्राउ परी प्रहरी हिरासतमा रहनुभएका राप्रपा वरिष्ठ उपाध्यक्ष रबीन्द्र मिश्रलाई आज पनि काठमाण्डौं प्रहरी परिसर पुगेर भेट्यौं ।
आज पनि उहाँले राज्य विरुद्धको कसुर हुने कुनै काम नगरेको दोहोर्याउनु भयो र आफूले न्याय पाउनेमा विश्वस्त देखिनुभयो। उहाँको आत्मविश्वास र आत्मबल उच्च छ ।
उहाँको शीघ्र रिहाइको लागि आवाज उठाइदिन विभिन्न राजनीतिक दल, मानवअधिकारवादी संघसंस्था, आमसञ्चार माध्यम, नागरिक समाज, प्रबुद्ध वर्ग लगायत सबैमा अपील गर्दछु।
